Grupu Voluntáriu Movimentu Tasi Moos (MTM) apoiu ekipamentu protesaun Face Shield hamutuk 100 ho Full Mask ida (1) ba Komandu Polísia Nasionál Timor-Leste (PNTL) Munisípiu Dili, segunda (11/05/2020). Imajen/MTM

DILI, 11 maiu 2020 (TATOLI) – Grupu Voluntáriu Movimentu Tasi Moos (MTM) apoia ekipamentu protesaun Face Shield hamutuk 100 ho Full Mask ida (1) ba Komandu Polísia Nasionál Timor-Leste (PNTL) Munisípiu Dili.

Apoiu ne’e oferese direita husi reprezentante MTM Leonel Hornai da Cruz ho Almério Lopes, ne’ebé akompaña mós membru sira balun hodi entrega ba komandante PNTL Munisípiu Dili, Superintendente Xefe, Armando Monteiro ho nia Segundu Komandante Superintendente Euclides Belo, segunda ne’e, iha Komandu PNTL Munisípiu Dili.

Ekipamentu hirak ne’e sei fasilita membru PNTL hodi utiliza taka oin iha terrenu kuandu halo atividade dezinfeta iha bairru-bairru no estrada públiku.

Komandante PNTL Munisípiu Dili, Superintendente Xefe Armando Monteiro. Imajen/Antonio Goncalves

Superintendente Xefe Armando Monteiro agradese  no louva  ba apoiu MTM nian ne’e tanba  bele fasilita liu tan membru PNTL iha terrenu.

“MTM a nia apoiu voluntáriu laiha intensaun seluk, maibé ho sentimentu umanidade mai husi sira ida-idak nia konsiénsia halibur malu no ohin mai kontinua fó apoiu tan ekipamentu hirak ne’e,” hateten Komandante Armando Monteiro.

Ba oin, Komandu PNTL Munisípiu Dili kontinua atividade dezinfeta iha estrada públiku hodi kontribui luta kombate propagasaun surtu Coronavirus ka COVID-19.

Almério Lopes  nu’udar reprezentante no membru MTM hateten, ekipamentu hirak ne’e nia rasik arranja no dezeña hodi prodús atu bele apoiu estadu Timor-Leste luta kontra propagasaun COVID-19 iha Timor-Leste.

Leonel Hornai da Cruz, nu’udar mós membru MTM esplika, sira mai ho moto kombate COVID-19, katak “Ama Bolu” entaun bolu duni sira ho asaun voluntáriu iha ne’ebé hahú iha loron 23 fulan marsu halo dezinfeta iha area Dili laran.

“Ami nota iha loron domingu ida ne’e, hanesan loron ikus ba ami movimentu nia asaun tanba estadu emerjénsia besik hotu, nune’e dalaruma ami la kontinua, tanba ami nia membru MTM balun sei hala’o fila-fali serbisu iha instituisaun sira ne’ebé sira haknaar-an ba,” hateten Leonel Hornai da Cruz.

Nia dehan, ho apoiu ekipamentu protesaun Face Shield ba PNTL hodi bele kontinua halo dezinfeta, tanba propagasaun COVID-19 daudaun ne’e kontinua eziste hela no presiza nafatin serbisu estra hodi halo prevensaun.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here