Portavóz Sala Situasaun Sentru Integradu Jestaun Krize (CIGC-sigla portugés), Rui Maria de Araújo. Imajen/TATOLI.

DILI, 11 maiu 2020 (TATOLI)-Portavóz Sala Situasaun Sentru Integradu Jestaun Krize (CIGC-sigla portugés), Rui Maria de Araújo, afirma to’o segunda ohin nia parte la deteta kazu transmisaun surtu COVID-19 iha komunidade nia le’et.

Ministériu Saúde liuhosi programa triazen vijilánsia sentinela iha territóriu Timor-Leste halo ona amostra ba ema na’in 268 ne’ebé iha sintoma coronavirus maibé pursentu 41 maka rejultadu sai ona negativu.

“Oras ne’e daudaun Ministeriu Saude halo esforsu makaas atu halo ezame laboratóriu ba ema barak liután liuhosi mekanizmu triajen vijilánsia sintinela hodi nune’e bele hatene ita sei iha kazu COVID-19 iha komunidade nia le’et ne’ebé maihosi tranzmisaun komunitaria ka lae,” informa, Eis Primeiru-Ministru, Rui Maria de Araújo, durante konferénsia imprensa iha CCD, Merkadu-Lama, ohin.

Husi pursentajen ne’e inklui mós rezultadu teste laboratóriu ba komunidade sira iha Munisípiu Liquiça foinlalais.

“Amostra ne’ebé ita foti iha Liquiça relasiona ho vijilánsia sintinela hatudu pursentu 100 (%) negativu, ida ne’e indikadór ida hatudu mai ita to’o agora laiha evidensia katak iha Liquiça nia laran iha kazu COVID-19 ne’ebé tranzmite iha komunidade nia le’et, ita hein rejultadu seluk hosi munisípiu seluk iha loron hira tuirmai,” reforsa Doutór Timoroan ne’e.

Maski rezutadu provizóriu daudaun ne’e pursentu 100 negativu,maibé tuir nia ekipa vijilánsia epidemiolójika kontinua hala’o vijilánsia sentinela iha munisípiu ne’eba hodi foti amostra husi komunidade atu halo teste ba deteta sedu transmisaun surtu COVID-19 iha populasaun nia le’et.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here