Portavóz CIGC, Odete Viegas. Imajen Tatoli/Egas Cristovão

DILI, 10 maiu 2020 (TATOLI) – Tuir dadus ne’ebé fó sai husi Sala Situasaun, Sentru Integradu Jestaun Krize (CIGC, sigla portugés) katak ema rekuperadu husi moras COVID-19 ba ohin loron aumenta tan na’in-ida, nune’e totál rekuperadu hamutuk na’in-22.

Husi númeru 22 ne’e, na’in-18 maihusi kazu konfirmadu no na’in-haat husi kazu provável, enkuantu ema ne’ebé sei baixa iha fatin izolamentu Vera Crúz hamutuk na’in-neen.

“Na’in-neen ne’e maihusi klaster Ótel Katuas hotu. Totál profisionál saúde ne’ebé tama kuarentena hamutuk 53no aumentu númeru ne’e maihusi sira ne’ebé halo tratamentu iha fatin izolamentu”, dehan Portavóz CIGC, Odete Viegas liuhosi konferénsia imprensa iha Sentru Mídia COVID-19, iha Sentru Konvensaun Dili (CCD, sigla portugés), domingu ne’e.

Númeru teste sa’e ba na’in-909 kompara ho númeru horiseik na’in-852, nune’e mós rezultadu negativu ba ohin loron sa’e ba 781 kompara ho númeru horiseik na’in-750.

Totál númeru hein rezultadu na’in-104, enkuantu númeru kumulativu kazu konfirmadu hamutuk na’in-24, no konfirmadu foun ba ohin loron laiha.

Entretantu, totál ema sira ne’ebé sei iha kuarentena tantu kuarentena obrigatóriu no auto-kuarentena hamutuk 151.

Enkuantu, iha kuarentena obrigatóriu iha Dili na’in-89 no auto-kuarentena na’in-3, na’in-38 iha kuarentena obrigatóriu munisípiu no na’in-31 iha auto-kuarentena.

Sira ne’ebé pasa ona loron 14 iha kuarentena iha Dili hamutuk na’in-1.663 no iha munisípiu na’in-445, nune’e totál hamutuk 2.108.

Maski implementasaun Estadu Emerjénsia kuaze semana rua ona maibé profisionál saúde sira nafatin servisu luta kontra pandemia ne’e to’o Organizasaun Mundiál Saúde deklara vírus ne’ebé invade ona iha mundu ne’e laiha ona.

“Apela ba komunidade tomak maski Estadu Emerjénsia daruak bele termina maibé servisu ne’ebé Ministériu Saúde hala’o sei kontinua nafatin to’o COVID ne’e deklara globalmente laiha ona ka kuandu iha ona vasina kontra Coronavírus”, subliña atuál Diretora Prestasaun Saúde, Ministériu Saúde.

Prezidente Repúblika, Francisco Guterres ‘Lú Olo’ dekreta estensaun Estadu Emerjénsia iha loron 28 abríl hahú tuku 00:00 to’o loron 27 maiu 2020 iha tuku 23:59.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here