Autoridade Munisípiu Liquiçá hasai foto hamutuk ho entidade ONG internasionál, Mary Mackillop Today. Imajen Tatoli/Antónia Gusmão

Liquiçá, 08 maiu 2020 (TATOLI) – Organizasaun Naun Govermantál (ONG) internasionál Mary Mackillop Today liuhosi programa Biblioteka Móvel ofisialmente entrega materiál saúde ijiene hodi prevene surtu COVID-19 atu labele transmite ba komunidade inklui mós materiál promosaun saúde ba moras dengue.

Seremónia entrega ofisiál materiál sira ne’e hala’o iha sede Suku Luhata, Munisípiu Bazartete, Munisípiu Liquiçá, ne’ebé partisipa husi reprezentante servisu Ministériu Saúde no Ministériu Edukasaun Munisípiu Liquiçá no reprezentante ONG Child Fund Timor-Leste.

Programa ne’e realiza tanba hetan apoiu koordenasaun másimu husi Ministériu Saúde Nasionál, liuliu pilar 2 ba promosaun no monitorizasaun COVID-19 iha Timor-Leste.

Country Director Mary Mackillop Today, Alípio Baltazar, hateten objetivu hosi apoia sira ne’ebé mak fornese ba komunidade sira iha postu Administrativu Bazartete, Munisípiu Liquiçá, atu prevene Coronavírus no mós moras dengue.

“Ami aproveita halo kampaña ba prevensaun COVID-19 no ami hakarak mós halo halo kampaña kona-ba COVID-19 no iha tempu hanesan ba mós dengue tanba moras rua ne’e ninia risku boot tebes iha komunidade nia leet”, hateten Country Director Alípio Baltazar hafoin entrega sasán sira ne’e iha sede Suku Lauhata, sesta ne’e.

Programa sira ne’e realiza tanba desde iha tinan-2016 ekipa Mary Mackillop Today hahú servisu iha Liquiçá.

“Ami foka liu hodi fó apoia ba eskola sira liuhosi ami-nia programa hanaran Biblioteka Móvel hodi fornese lisaun ba labarik sira no mós saúde báziku, ne’ebé bainhira surtu COVID-19 ne’e tama mai ami-nia programa ne’e paradu, entaun oinsá maka ami bele intensifika fali ami-nia apoia sira antes ne’e, entaun ami troka ho apoia materiál hodi halo prevensaun ba surtu COVID-19 no dengue”, nia akresenta.

Nune’e, ONG Internasionál iha esperansa katak ho apoia ne’ebé oferese bele tulun komunidade sira atubele prevene di’ak liután sira nia-an liuhosi fase liman ho sabaun no mós ponter sira ne’ebé oferese.

Antes ne’e Mary Mackillop Today servisu hamutuk ho Ministériu Saúde (MS) hodi fó apoia hodi halo kampaña hasa’e koñesementu populasaun sira-nia hodi halo prevensaun ba surtu COVID-19 iha Timor-Leste no apoia ne’e antes hala’o ona ba iha Munisípiu Viqueque, Munisípiu Manufahi no agora iha Liquiçá, ne’ebé tuir planu sei fornese mós ba iha Munisípiu Emera.

Iha fatin hanesan, Koordenador Pilar 2 COVID-19 Asuntu Komunikasaun Risku no Mobilizasaun Komunidade, MS, Raul Sarmento, lori MS nia naran hato’o agradese ba parseiru tanba bele fornese ona materiál sira ba komunidade ligadu ho surtu COVID-19 no moras dengue iha Munisípiu Liquiçá.

“Ministériu Saúde agradese tebes ba apoia sira ne’e, tanba durante implementasaun Estadu Emerjénsia sira ita-nia parseiru sira ne’e mak apoia ba ita, inklui halo mobilizasaun kampaña ba munisípiu”, dehan Raul Sarmento.

Nune’e mós, Sekretáriu Munisípiu Liquiçá, Renato Nunes Serão, husu ba komunidade sira atu nafatin atu kumpre regra ne’ebé fó sai ona husi MS no Organizasaun Saúde Mundial (OMS) ba prevensaun COVID-19 iha Timor-Leste.

“Ha’u hakarak husu ba populasaun tomak iha munisípiu Liquiçá nian katak kolaborasaun iha prosesu prevensaun surtu COVID-19 importante tebes, maski ita-nia Munisípiu Liquiçá rasik iha ema pozitivu maibé ne’e la’ós transmisaun lokál maibé estranjeiru, maibé ita nafatin koopera hodi halo tuir regra sira ne’ebé husi Ministériu Saúde no Organizasaun Mundiál Saúde fó sai ona mai ita tanba moras ne’e ameasa tebes”, apela Sekretáriu Munisípiu Liquiçá.

Reprezentante Administadór Munisípiu Liquiçá ne’e rekoñese katak kontribuisaun husi parseiru sira ne’e importante tebes no apoia sira ne’e la’ós foin ohin maibé antes ne’e liuhosi programa edukasaun nian la’o ona, liuliu haree ba merenda eskolár, ijiene, haree mós parte hosi saúde nian.

“Sira nia kontribuisaun barak tebes, ida ne’e mak ita-nia parseiru dezenvolvimentu sira-nia ajuda ba Governu iha asuntu sira ne’e”, nia akresenta.

Entretantu, pekote materiál ijiene sira mak hanesan Balde, sabaun fase liman inklui materiál ba desiminasaun informasaun kona-ba surtu COVID-19, inklui moras dengue nian.

Sasán sira ne’e kompostu husi balde unidade 1.000, sabaun been unidade 1.000, panfletu COVID-19 folla 1000, panfletu nutrisaun ka hahán di’ak folla 1.000, no panfletu dengue folla 1.000.

Enkuantu, pakote materiál hirak ne’e sei benefisia ba família 1.000 husi aldeia 10 no kada aldeia iha família 100 ne’ebé mak hetan materiál hirak ne’e.

Família hirak ne’e hanesan inan-aman husi labarik no estudante iha Eskola Ensino Báziku (EBF) 12 ne’ebé pertense ba Postu Administrativu Bazartete hanesan EBF 1.2 Caitehu, EBF 1.2 Lauhata, EBF 1.2 Bazartete, EBF 1.2 Lebulua, EBF 1.2 Gamanuhati, EBF 1.2 Turleu, EBF 1.2 Asumanu, EBF 1.2 Leburema, EBF 1.2 Baura, EBC Leorema, EBF 1.2 Ermeta, EBF 1.2. Fahilebo.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here