Ministra Solidariedade Sosiál no Inkluzaun, Armanda Berta dos Santos Hamutuk Vise-Ministru Administrasaun Estatál, Abílio José Caetano Sosializasaun Apoiu Monetariu ba Uma-kain iha Ambitu Pandemia Covid-19 ba Prezidente Autoridade Munisipiu, Administrador Munisipiu no Diretór Sentru Solidariedade Sosial Munisipiu no inklui RAEOA. Imajen /Egas Cristovão

DILI, 08 maiu 2020 (TATOLI)—Governu liuhosi Ministériu Solidariedade Sosiál no Inkluzaun (MSSI) no Ministériu Administrasaun Estatál (MAE), ohin, konvoka reuniaun nivel munisipál ho Autoridade Munisípiu no Administradór Munisipál atu verifika dadus agregadus familiár hosi totál família hamutuk 204-resin tuir dadus sensus nasionál iha 2015 ne’ebé seidauk inklui família foun sira.

Ministru Administrasaun Estatál Ein-Ezersisiu, Abilio José Caetano hateten, iha reuniaun ne’e ko’alia kona-ba dadus apoiu programa uminitária ba komunidade sira iha situasaun pandemia COVID-19. Tanba, enkontru ne’e hodi halo sosializasaun ba Autoridade Munisípiu no Administradór Munisipál sira atu bele iha kuñesementu kona-ba fundu maibé iha diskusaun ne’e bele iha mudansa ba agregadus familiár.

“Dahuluk, ita halo sosializasaun ba ita-nia administradór sira. Infelizmente diploma ministeriál ne’e sei hadi’a. Antes halo pagamentu, MAE-MSSI tenke asina uluk hafoin pagamentu ne’e banati tuir diploma ministeriál no iha diskusaun ida-ne’e bele iha mudansa ba dadus agregadus familiár,” dehan Ministru Ein-Ezersisiu Minsiteriu Administrasaun Estatal (MAE), Abilio José Caetano, ba jornalista sira iha Salaun MSSI, Caicoli, Dili, sesta ne’e.

Nia hatutan, dadus agregadus familiár seidauk serteza maibé bazeia ba agregadus familiar iha tinan 2015 iha 204.000-resin, hafoin ne’e MSSI ho MAE halo reuniaun hodi aumenta ho dadus adisionál entaun hetan pursentu lima (5%) hodi aumenta ba 214-000-resin agregadus familiár.

Maibé, nia informa, iha dekretu-lei ne’e hakatuir katak família tantu administrasaun públiku, funsionáriu públiku no Polísia Nasionàl Timor Leste (PNTL) no Falintil-Forsa Defeza Timor Leste (F-FDTL) sira ne’ebé nia saláriu liu $500 inklui agregadus ne’ebé serbisu iha setór privadu, sira ne’e nia naran la tama ba agregadus familiár.

Governante ne’e hateten, dadus hirak ne’e sei halo crosscheck liuhosi seguransa sosiál hafoin ne’e mak sei fó sai rezultadu.

Entretantu, Ministra Solidaridade Sosiál no Inkluzaun (MSSI), Armanda Berta dos Santos hateten, ohin autoridade munsipál sira partisipa iha enkontru koordenasaun implementasaun dekretu-lei númeru:15/2020 de 30 de abril, kona-ba apoiu monetáriu agregadus familiár iha ámbitu pandemia COVID-19.

“Ohin, ita halibur malu iha fatin ida ne’e hodi enkontru ho Prezidente Autoridade Munisípiu no Administradór Munisipál inklui diretór sira iha Ministeriu Solidaridade Sosiál no Inkluzaun (MSSI) atu ko’alia kona-ba apoiu monetáriu agregadus familiár iha ámbitu pandemia Covid-19 ne’e,” Ministra Armanda hateten.

Sosializasaun Apoiu Monetariu ba Uma-kain iha Ambitu Pandemia Covid-19 ba Prezidente Autoridade Munisipiu, Administrador Munisipiu no Diretór Sentru Solidariedade Sosial Munisipiu no inklui RAEOA. Imajen /Egas Cristovão

Governante ne’e hatutan, objetviu hosi reuniaun ida ne’e atu hametin liña koordenasaun no tau forsa hotu-hotu hodi atinji ba implementasaun progarma apoiu agregadus familiár to’o iha benefisiáriu sira.

Nia hateten, nia parte simu orientasaun téknika hosi nasionál ba autoridade sira iha nivél munisipál hodi komunika ba autoridade komunitáriu sira atu entende di’ak enkuadramentu legál.

“Fo koñesimentu di’ak ba autoridade sira atu entende di’ak kritériu no alvu hosi programa agregadus familiár ne’e. Hein katak hosi reuniaun ida-ne’e ba oin autoridade munisipál sira, hosi MAE no Diretór sentru MSSI bele iha ona koñesimentu kle’an ba implementasaun programa apoiu monetáriu ba agregadus familiár ne’e,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here