Embaixadór Uniaun Europeia, Andrew Jacobs ho Reprezentante Rezidente UNDP iha Timor-Leste Munkhtuya Altangerel asina MoU.Imajen Antonio Gonsalves

DILI, 07 maiu 2020 (TATOLI)-Embaixadór Uniaun Europeia, Andrew Jacobs ho Reprezentante Rezidente UNDP iha Timor-Leste Munkhtuya Altangerel, kinta ohin, estabelese memorandu intendimentu (MoU-sigla inglés) ida hodi apoiu osan millaun $ 4 ba implementasaun polítika dezentralizasaun.

Hosi apoiu millaun $ ne’e, Uniaun Europeia oferese hamutuk millaun $ 3,6 no UNDP $ 400.000.

Serimonia estabelesimentu nota intendimentu ne’e asiste direta hosi Ministru Negósiu Estranjeiru no Kooperasaun, Dionísio Babo Soares ho Vise Ministru Administrasaun Estatál, Abílio José Caetano iha edifísiu MNEK, Praia dos Coqeiros Dili.

Embaixadór UE iha Timor-Leste, Andrew Jacobs informa, MoU ne’e ho ninia objetivu jerál maka kontribui ba dezenvolvimentu sustentável Timor-Leste nian, hodi buka atu hakbesik governasaun hodi presta servisu ba povu.

Alende ne’e, aborda iha kontestu prosesu desentralizasaun liliu kapasitasaun ba funsionáriu públiku nivel lokal, governasaun efetivu no inkluzivu hodi asesu ba dadus ne’ebé di’akliu, planu ne’ebé informadu no ba prosesu foti desizaun, estrutura polítika desentralizasaun ida ne’ebé di’ak no partisipasaun husi ema vulnerável.

Programa kooperasaun ne’e mós foka ba prevensaun transmisaun COVID-19 liliu tulun governu liuhosi kampaña prevensaun, kriasaun estasaun fase liman iha Munisípiu sira inklui asuntu seluk tan.

“Ha’u kontente tebes bainhira ha’u rona katak Uniaun Europeira sei kontribui ba kontinuidade servisu Parlamentu Nasionál, Ministériu Administrasaun Estatál no Autoridade Munisípiu sira, projetu sei ajuda Parlamentu Nasionál atu mantein negosiu liuhosi instalasaun sala imprensa no sala konferénsia imprensa ba knua komunikasaun hodi implementa kampaña komunikasaun ida kona-ba kestaun sosiál sira ne’ebé relasiona ho COVID-19,” nia Embaixadór UE, Andrew Jacobs ba Jornalista sira iha MNEK, ohin.

Iha Projetu UE-PNUD ne’e mós sei estabelese sistema komunikasaun online ida hodi garante relasaun ne’ebé forte liu ho sidadaun sira durante estadu emerjénsia.

Programa foun ne’e komplementár ho apoiu orsamentu ho valór euro 11,25 finansiadu hosi Uniaun Europeia ba dezentralizasaun no deskonsentrasaun ne’ebé maka asina ona hosi MNEK Dionísio Babo Soares ho Embaixadór UE, Andrew Jacobs iha fulan-fevereiru 2020 liubá.

Iha fatin hanesan Reprezentante Rezidente PNUD iha Timor-Leste, Munkhtuya Altangerel, orgullu ho nota kooperasaun ne’e hodi promove governasaun lokal ba presta servisu iha munisípiu ho di’ak liután.

“Ami orgullu hodi fó liman no esforsu atu promove governasaun lokál inkluzivu no prestasaun servisu iha munisípiu Timor-Leste nian. Kapasitasaun no dezenvolvimentu abilidade mak sei sai hanesan ami nia ferramenta prinsipál hodi alkansa dezenvolvimentu lokál ne’ebé kapasitadu,” dehan Munkhtuya Altangerel.

Iha programa ne’e, PNUD kompromitidu atu reforsa prioridade ba populasaun vulnerável sira-nia nesesidade no sei kontinua servisu hamutuk ho Ministériu Administrasaun Estatál no Delegasaun Uniaun Europeia hodi garante moris di’ak ba komunidade rurál ne’ebé hanesan.

“Situasaun atuál presija abordajén ne’ebé fo’un, parseria no inovasaun ne’ebé onestu hodi garante katak sei la husik ema ida hela iha kotuk.” nia sublina.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here