Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 07 maiu 2020 (TATOLI)-Tuir informasaun ne’ebé maka TATOLI asesu hosi Servisu Diplomata Timor-Leste iha Reinu Unidu (United Kingdom) hateten, Timoroan feto ida ho naran Luciana Viviana da Silva, mate ona iha loron 03 fulan-maiu 2020, tuku 11 kalan, oras Irlanda Norte, tanba sofre moras komplikasaun pneumonia no deskunfia COVID-19.

Entretantu, Ministru Negósiu Estranjeiru no Kooperasaun (MNEK), Dionísio Babo Soares, informa nia simu ona informasaun ne’e husi Embaixadór TL iha UK, Gil da Costa, katak Timoroan ne’e mate tanba deskunfia moras COVID-19, maibé sei hein karta justifikasaun loloos husi médiku sira.

“Ha’u simu tia ona informasaun hosi ita-nia embaxadór iha Inglaterra nian, katak Timoroan ida ne’ebé hela iha ne’ebá, ema ne’e moris iha Dili, feto ho idade 58 hakotu ona iis dehan hetan COVID-19, ha’u fó ona informasaun ba Sentru Integradu Jestau Krize (CIGC-sigla portugés) maibé ita sei hein hela konfirmasaun hosi UK mak foin bele hatene loos”, dehan MNEK Dionísio Babo Soares ba jornalista sira iha Praia dos Coqeiros Dili, ohin.

Atu konfirma loloos matebian mate tanba sofre coronavirus, Governu presiza karta ofisiál hosi Médiku Irlanda Norte hodi hatene loloos kauza hosi matebian nia mate.

“Ita foin rona informasaun hosi mensajen, maibé seidauk haree iha duni karta ruma hatene ema ne’e hetan duni moras ne’e mak mate ka lae, ita sei konfirma halo didi’ak”, Governante ne’e reforsa liután.

Dionísio Babo Soares, reprezenta Governu daualu hato’o sentidu kondolénsia profunda ba família enlutada.

Hosi Parte seluk, Embaixadór TL, iha Reinu Unidu, Gil da Costa, mós hato’o ona sentidu kondolénsia profunda ba família enlutada no Komunidade Timoroan iha Irlanda Norte.

Isin-mate husi matebian ne’e daudauk ne’e iha hela Irlanda Norte hodi hein prosesu funébre tuirmai.

Entretantu, matebian moris iha Dili, iha loron 17 fulan-dezembru 1961, mate ho idade 58, solteira.

Matebian ho naran estimadu Anoy Soriana ne’e servisu iha moypark, hela iha 70 woodburn Crescent, Dungannon, Irlanda Norte.

Jornalista   : Hortencio Sanchez

Editór         : Agapito dos Santos

HAKEREK NO HATÁN

Please enter your comment!
Please enter your name here