Primeiru-Ministru, Taur Matan Ruak. Imajen /Egas Cristovão

DILI, 07 maiu 2020 (TATOLI—Primeiru Ministru (PM), Taur Matan Ruak, sente kontente tanba pasiente COVID-19 ne’ebé durante ne’e hala’o tratamentu intensivu iha sentru izolamentu Vera Cruz, maioria hetan ona rezultadu negativu no fila hikas ona ba komunidade hodi moris hamutuk ho sira-nia família.

Primeiru-Ministru hatutan, rezultadu negativu hosi surtu COVID-19 ne’e hatudu katak Timor-Leste iha kazu provável tolu no kazu pozitivu haat no pasiente (joven) sira rekopera lalais ne’e hanesan susesu ida ba Timor-Leste atu prepara aan di’ak liu ba tempu oin mai

“Enkontru semanál ho Prezidente Republika, ohin, ami ko’alia asuntu tolu (3). Ida, informa kona-ba situasaun seguransa rai laran. Ida seluk, ko’alia kona-ba implementasaun Estadu Emerjénsia no ida ikus liu ko’alia kona-ba rezultadu COVID-19, liu-liu sira ne’ebé rekopera ona. Ko’alia kona-ba rezultadu ne’ebé hatudu katak ita iha kazu provável tolu no kazu pozitivu haat, restu ne’e rekoperadu. Ita kontente loos tanba ita-nia joven sira rekopera lais loos. Ne’e di’ak no susesu ba ita, atu prepara aan di’ak liu ba tempu oin mai,” dehan Primeiru-Ministru, Taur Matan Ruak, ba jornalista sira hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidensiál, Bairru Pité, Dili, kinta ne’e.

Entretantu, situasaun kazu Coronavirus (COVID-19) ne’ebé atualiza hosi Sala Situasaun Sentru Integradu Jestaun Krize (CIGC-sigla Portugés) ba Kuarta loron 6 fulan maiu hatudu katak númeru rekoperadu iha na’in 21 (konfirmadu na’in 17 +provável  na’in 4).

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here