Prezidente PD, Mariano Assanami Sabino Hamutuk Sekretáriu Jerál PD António da Conçeição ‘Kalohan' Akompanhia Husi Membru CDN PD .Hala’o Konferensia Imprensa iha Sede PD. Imajen/Egas Cristovão

DILI, 07 maiu 2020 (TATOLI)—Partidu Demokrátiku (PD) deklara dala ida tán katak prontu apoia kualkér Governu ne’ebé de’it hodi hakotu inserteza polítika ne’ebé la’o durante tinan tolu ona.

Prezidente Partidu Demokrátiku (PD), Mariano Assanami Sabino hateten, preferénsia PD ba modelu governasaun ida-ne’e mak  di’akliu ne’e mak Governu sé de’it mak ba ukun, ukun atu serbí povu. Ho ida-ne’e PD husu dala ida tán ita bele aselera lalais ona Governu ida-ne’ebé estável para la’o bá-oin ho Orsamenu Jerál Estadu ida ke bele hakotu ona impase polítiku hodi hadi’a ekonomia.

“PD ba estadu, prosesu hotu-hotu iha Prezidente Repúblika nia liman. Governu nee’ebé de’it PD prontu fó apoiu la’o bá-oin. Sé de’it mak ba ukun, ukun atu serbí povu no ukun atu serbí ita-nia rai. Ho ida-ne’e PD husu dala ida tán ita bele aselera lalais ona Governu ida-ne’ebé estável para la’o bá-oin ho Orsamenu Jerál Estadu ida ke bele hakotu ona ita-nia impase polítiku hodi hadi’a ita-nia ekonomia liuliu oinsá mak bele rekupera ita-nia ekonomia, fortalese fila-fali ita-nia komunikasaun polítiku,”  Prezidente Partidu Demokrátiku (PD), Mariano Assanami Sabino, ne’ebé akompaña hosi estrutura PD tomak, informa liuhosi Konferénsia Imprensa iha sede PD, Colmera, Dili, kinta ne’e.

PD kontinua hakarak husu nafatin para diálogu entre líder sira kontinua la’o no foti aas nafatin líder sira hanesan Kay Rala Xanana Gusmão, Marí Alkatiri, Lú Olo, Taur Matan Ruak no Jenerál Lere.

“Líder sira hanesan asset, husu nafatin atu iha komunikasaun, husu nafatin iha diálogu tanba diálogu no komunikasaun ne’e la’ós de’it intende malu atu ba kaer ukun maibé ne’e parte ida hosi ita-nia kultura, ne’ebé ita tenke iha komunikasaun duni,”  hateten Assanami.

Assanami ko’alia asuntu ne’e tanba impase polítiku ne’ebé la’o ona tinan tolu nia laran hamosu mós impase ekonomia, komunikasaun polítika, sosiál no kulturál.

Tanba ne’e, nia dehan, presiza iha ligasaun di’ak entre órgaun soberania hotu-hotu hodi haforte Timor-Leste.

“Governu ne’ebé de’it mak mosu ami sei fó apoia tomak para governu bele la’o di’ak, estável, atu-bele hadi’a ita-nia ekonomia no hadi’a ita-nia polítika rai-laran,” nia dehan.

Assanami rekoñese halo ona konferénsia hodi fó apoia ba koligasaun foun Aliansa Maioria Parlamentár (AMP) ne’ebé lidera hosi CNRT maibé oras ne’e prosesu sei la’o hela.

“Maibé ohin, ami halo konferénsia imprensa ne’e atu dehan governu ne’ebé de’it mak bá-oin PD ba estadu fó apoiu ba estabilidade ida di’ak no ba povu ida-ne’e. Ba rai-ida-ne’e, PD mantein pozisaun ba estadu tanba durante VIII Governu mós PD vota a-favór ba orsamentu, vota a-favór ba programa. Haree ba povu hamlaha laiha dalan ba PD atu hola pozisaun hanesan opozisaun ba siotuasaun sira hanesan ne’e,” dehan Assanami.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here