Xefe Estadu Maior Jenerál FALINTIL-Forsa Defeza Timor-Leste, Majór Jenerál Lere Anan Timur. Imajen/Antonio Goncalves.

DILI, 06 maiu 2020 (TATOLI)—Xefe Estadu Maiór Jenerál FALINTL Forsa Defeza Timor Leste (F-FDTL), Majór Jenerál Lere Anan Timur, konsidera situasaun impase polítika rai laran lori konsekuénsia maka’as ba dezenvolvimentu instituisaun FALINTIL-Forsa Defeza Timor Leste.

“Situasaun poilitika rai laran lori konsekuénsia maka’as ba dezenvolvimentu instituisaun FALINTIL-Forsa Defeza Timor Leste. Ezemplu, komponente Navál ne’ebé presia manutensaun ba ró patrullamentu, ladi’ak tanba osan laiha, karreta operasionál sira mós problema. Maibé, iha situasaun sira hanesan ne’e, ita labele hein de’it no buat ne’ebé ita bele halo, di’ak liu ita halo de’it,” dehan Lere Anan Timur ba jornalista sira hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidensiál Bairru Pité, Dili, kuarta ne’e.

Maski nune’e, Lere Anan Timur hanoin katak situasaun polítika la’ós buat foun tanba desde tinan 2017 to’o ohin loron Timor-Leste hela iha situasaun impase politika.

Tanba ne’e, nu’udár líder no nu’udár vateranu, Lere Anan Timur, husu tenke hola responsabilidade másimu liuliu ba partidu polítiku sira, líder polítiku sira, líder nasionál sira, ida-idak tenke husu ninia aan katak desde ukun aan to’o ohin loron, ida-idak ninia responsabilidade to’o iha ne’ebé no oinsá buka solusaun atu ultrapasa situasaun ne’e.

Líder forsa armada ne’e mós deklara katak maski situasaun polítika halo nusa ba mós, ema ida sei la influénsia forsa armada (F-FDTL).

Jornalista : Cipriano Colo

Editór       : Cancio Ximenes

1 KOMENTÁRIU

  1. Ita nia saude iha Ita nia liman rasik. Sr nb ulun to’os, konsekuensia bainhira kona llka basa rentos

HAKEREK NO HATÁN

Please enter your comment!
Please enter your name here