Eis Prezidente Interniu Autoridade RAEOA/ZEESM, Arsenio Bano, tuun hosi aviaun Air North la kumpre kaurentena obrigatoriu, kuarta (06/05/2020). Imajen/Xisto Freitas

DILI, 06 maiu 2020 (TATOLI)-Abitante Timoroan hotu ne’ebé fila husi rai afetadu Coronavirus ka COVID-19 tenke submete ba kuarentena obrigatóriu durante loron-14 nia-laran hodi fasilita médiku sira halo observasaun ba abitante sira-ne’e nia saúde. Maibé, realidade oin-seluk ho Arsenio Bano, ne’ebé kuarta (06/05/2020), foin fila husi Australia mai Timor-Leste ho Aviaun Air North, la kumpre kuarentena obrigatóriu, maibé  ba halo auto-kuarentena de’it.

 Jornalista Ajénsia Tatoli liuhusi konferénsia imprensa iha Sentru Mídia CIGC (Sentru Integradu Jestaun Krize) halo konfirmasaun ho Koordenadór Forsa Tarefa Prevensaun no Metigasaun Surtu COVID-19, Sergio Lobo, kona-ba oinsá mak eis prezidente autoridade interinu ZEESM/RAEOA, Arsenio Bano, la bele kumpre kuarentena obrigatóriu hafoin fila husi nia viajen.

Portavóz Gabinete Sentru Integradu Jestaun Krize (CIGC), Sergio Lobo. Imajen/Egas Cristovao

Hatán ba pergunta ne’e, Sergio Lobo klarifika katak, parte CIGC sei halo konfirmasaun ho ekipa médiku hodi buka hatene klaru razaun saida mak Arsénio Bano ne’ebé viajen husi Australia mai Timor-Leste  ho aviaun Air North tenke ba auto-kuarentena.

Iha mós sidadaun estranjeiru na’in-ida ho inisiál AJR foin tama husi Australia mai Timor-Leste ho aviaun Air North kumpre regra mai ho sertifikadu livre COVID-19  no hetan autorizasaun husi Primeiru-Ministru atu tama mai Timor-Leste hala’o serbisu iha area emerjénsia iha Ajénsia Internasionál WFP (Word Food Programme).

Sergio Lobo esplika, tuir rezolusaun governu númeru 01/GAB-MTK/V/2020 fó sai regra sia (9) ba abitante hotu atu kumpre, no husi regra ne’e iha númeru dahaat (4) fó sai klaru ona katak, Timoroan ne’ebé foin fila husi estranjeiru tenke obrigatóriu tama kuarentena no bandu ema estranjeiru tama mai Timor-Leste.

“Loloos ne’e hotu- hotu tenke tama kuarentena, maibé se ema prienxe kondisaun atu halo auto-kuarentena sei iha kondisaun espesiál hanesan nia hela iha kuartu mesak no labele iha ema hela hamutuk ho nia, mantein distánsia sosiál, kumpre ijiene pesoál, ne’e bele,” hateten Sergio Lobo.

Sergio hatutan, ekipa médiku mós sei haree kondisaun se sidadaun ne’e (Arsenio Bano) hela iha auto-kuarentena tenke prienxe rekizitu hotu ne’ebé Ministériu Saúde fó sai ona no mantein kontaktu no pesoál saúde hodi fó asisténsia para evita propagasaun surtu Coronavirus ka COVID-19.

Tuir observasaun Ajénsia Tatoli nian nota, eis membru Parlamentu Nasional husi FRETILIN ne’e too Aeroportu simu direita husi família hodi tula kedas nia ba uma no la akompaña hosi ekipa médiku ruma.

Ajénsia Tatoli tenta konfirma asuntu ne’e ho Arsenio Bano, maibé labele hetan konfirmasaun.

Iha parte seluk, Programme  Oficer World Food Programme (WFP), Crispin da Costa Araújo,  klarifika, sidadaun estranjeiru na’in-ida ho inisiál AJR mai husi Australia ho objetivu atu ajuda serbisu WFP nian, tanba ne’e, nia tenke kumpre regra hodi hela iha kuarentena.

“Ema estranjeiru ho inisiál AJR mai husi nasaun Austrália, objetivu husi ninia prezensa iha Timor -Leste mak atu suporta WFP no ninia pozisaun agora hanesan Koordenadór WFP ba área emerjénsia nian,”  tenik Crispin ba Ajénsia TATOLI, liu husi komunikasaun telefónika.

Sidadaun estranjeiru ne’e hetan autorizasaun ka despaxu husi Primeiru-Ministru, Taur Matan Ruak no iha mós karta ofisial husi Prezidente Koordenadór husi Organizasaun Nasoins Unidas ne’ebé mak husu ona lisensa iha Xefe Governu Timor-Leste katak ema ne’e atu   hala’o serbisu iha Timor-Leste.

Oras nee daudaun nia hala’o hela ninia auto-kuarentena iha Palm Beach Hotel no estranjeiru ne’e mós  lori karta Medical Test ofisial ida husi Austrália ho rezultadu negativu no ninia rezultadu medikál iha hela serbisu saúde nia liman.

 Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here