Admistradór Postu Administrativu Vera Cruz, Octavio Vieira Amaral. Imajen/Osória Marques.

DILI, 05 maiu 2020 (TATOLI)–Admistradór Postu Administrativu Vera Cruz, Octavio Vieira Amaral hateten, ohin loron ikus atu submete dadus populasaun ka Xefe Família 9.514 hosi suku hitu (7) ne’ebé pertense ba Postu Administrativu Vera Cruz ba Autoridade Munisípiu Dili.

“Ohin, ami submete ona dadus xefe família hamutuk 9.514 hosi Postu Administrativu Vera Cruz nian ba iha Munisípiu Dili atu bele hetan subsídiu. Data limite (deadline) ne’ebé mak Munisípiu Dili sirkula mak loron ohin. Tanba ne’e, ohin ami sei submete dadus populasaun ba Autoridade Munisípiu Dili, nune’e parte Ministériu Administrasaun  Estatál, Ministériu Solidaridade Sosiál no Inkluzaun, no Ministériu Finansas bele prosesu ona,” dehan Octavio Vieira Amaral ba Ajénsia TATOLI iha nia knaar fatin, Mascarenhas, Dili, tersa ne’e.

Nia dehan, tuir autoridade lokál no Prezidente Autoridade Munisípiu Dili hamutuk ho Ministériu Administrasaun Estatál (MAE), Ministériu Solidaridade Sosiál  no Inkluzaun (MSSI) no Ministériu Finansas (MF) katak loron ohin loron dahuluk Postu Administrativu Vera Cruz atu submete dadus subsídiu ne’e.

Administradór ne’e hatutan, parte autoridade lokál sira tun ba terresnu hodi halibur komunidade sira-nia dadu hanesan xefe familia nia naran, hodi konfrima ba kartaun eleitorál no format ficha familia.

“Ami haruka ita-nia autoridade lokál sira hasai sira-nia naran xefe família nian,  númeru eleitorál no formatu fixa família no submete mai ami nune’e ita bele prosesu ba munisípiu,” nia subliña.

Tuir nia , uma-kain foun iha suku no aldeia iha Vera Kruz iha tinan ne’e mós iha ona direitu hodi hetan subsidiu no sira mós konklui ona fixa família.

“Hosi totál dadus 9.514 ne’e konklui hotu ita-nia polulasaun ne’ebé foin harii família. Tanba sira mós iha ona direitu no presiza duni hetan atensaun hosi Governu. Maibé ita seidauk hatene desizaun hosi Governu. Hosi dadus refere maioria uma-kain permanente,” nia dehan.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here