Membru PNTL rega ai-moruk dezinfetante (disinfectant) ba transporte públiku iha Dili laran hodi prevene surtu COVID-19, kuarta (08/04/2020). Imajen/Nelson de Sousa

DILI, 05 maiu 2020 (TATOLI)- Governu Timor-Leste liuhosi Ministériu Transporte no Komunikasaun (MTK) aprezenta ona despaxu ho númeru 01/GAB-MTK/V/2020 kona-ba  regra sia (9) hodi regula abitante sira, inklui reativa movimentu transporte públiku hodi kumpre nafatin implementasaun estadu emerjénsia (EE) segunda etapa.

Komandante PNTL Munisípiu Dili, Superintendente Xefe Armando Monteiro. Imajen/Antonio Goncalves

Komandante Polísia Nasional Timor-Leste (PNTL) Munisípiu Dili, Superintendente Xefe Armando Monteiro, informa, despaxu governu nian ne’e entrega iha segunda (04/05/2020), nu’udar pasu importante reforsa serbisu PNTL nian para sensibiliza informasaun kle’an ba abitante no motorista transporte públiku atu kumpre.

Regra sira-ne’e maka hanesan: 1). Pratika ijiene ba pesoál beibeik, fase liman ho sabaun, mantein distansiamentu sosiál, evita kontaktu fíziku no uza máskara bainhira halo movimentu.

2). Ba vendedores ambulante, loja, supermerkadu, mini supermerkadu, restaurante, estasaun kombustivel no tipu negósiu seluk tenke prepara fasilidade fase-liman nian.

3). Suspensaun atividade edukasaun, téknika formasaun profisionál, tipu jogu desportivu sira hotu, halo festa, kulturál, relijioza (misa, sholat), halibur-malu iha grupu, halo greve, demonstrasaun no vizita mate uma, simultánea labele liu ema na’in sanulu.

4).  Timoroan ne’ebé foin fila hosi estranjeiru, tenke obrigatóriu tama kuarentena no bandu ema estranjeiru tama mai Timor-Leste.

5). Sidadaun ne’ebé hetan sintoma tenke ba teste iha ekipa vijilánsia no hetan pozitivu tama izolamentu.

6). Ba transporte koletivu ba pasajeiru Bus, Mikrolete, Angguna, Taxi, Tum-Tum, tenke garante sanitaria, fase moos, dezinfeta, kondutór no konjak tenke uza máskara no luvas.

7). Kondutór no konjak garante katak, pasajeiru hotu  atu sa’e karreta tenke uza máskara, no tuur iha karreta laran labele rabat malu ka kontaktu fíziku.

8). Ba autokarru tula pasajeiru hosu munisípiu mai Dili, para de’it iha terminál ne’ebé dezigna ona, nu’udar parajen no estasionamentu hanesan terminál Becora, Taibesi, Manleuana, Tasi-Tolu no labele tula no hatún pasajeiru iha fatin ne’ebé la’ós barrajen no estasionamentu.

9). Komandu PNTL Munisípiu Dili sei halo medida polisiál ba sidadaun sira ne’ebé viola regra Estadu Emerjénsia, tuir lei kódigu penál Timor-Leste nian artigu 2440 dezobediénsia ba orden estadu.

“Ami nafatin apela ba sidadaun hotu iha kapitál Dili, ita nian kontribuisaun kolaborasaun importante, hamutuk ita prevene no kombate surtu Coronavirus ka COVID-19, hodi saliva ita nia vida, família no nasaun,”  alerta Komandante PNTL Munisípiu Dili, Superintendente Xefe Armando Monteiro,  ba jornalista liuhosi konferénsia imprensa, ohin, iha Komandu PNTL, Caicoli, Dili.

Tuir planu, iha tempu besik Komandu PNTL sei konvida motorista transporte hodi sensibiliza regra ne’e.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here