Motorista Mikrolete Diresaun 010 Tasi-Tolu - Bidau, Agostinho Alberto Carlos. Imajen Tatoli/Joanico de Araújo

DILI, 05 maiu 2020 (TATOLI) – Relasiona ho estensaun períodu Estadu Emerjénsia, Governu daudaun ne’e aprova ona medida ne’ebé iha alterasaun iha parte balun, hanesan iha fleksibilidade ba movimentasaun transporte públiku maibé tenke kumpre medida ne’ebé Governu estabelese ona.

Hanesan mós mikrolete, maski iha ona fleksibilidade ba movimentasaun maibé iha limitasaun bainhira tula pasajeiru durante períodu Estadu Emerjénsia, nune’e bele halo distansiamentu fíziku hodi evita propagasaun COVID-19.

Motorista Mikrolete Dirasaun 010 Tasi-Tolu – Bidau, Agostinho Alberto Carlos, hateten sira hahú halo fali operasaun hafoin Dekretu-Lei numeru 8/2020 kona-ba aplikasaun ba Estadu Emerjénsia daruak autoriza transporte públiku sira halo operasaun.

“Ami hahú halo fali ona opersaun ba mikrolete maibé ami tula de’it másimu ema na’in-lima, kuadu liu ema na’in-lima ne’e Polísia sei hatun pasajeiru sira, tanba ne’e lei ami labele kontra maibé halo tuir de’it”, dehan Motorista ne’e ba Agência Tatoli iha Lecidere, tersa ne’e.

Nia konsiente, atu prevene moras COVID-19 maka nia iha obrigasaun kumpre distánsia sosiál.

“Mikrolete mós halo distansiamentu sosiál tanba Polísia sira loron-loron halo pasa revista hela de’it ba kondutór sira ne’ebé la kumpre sei prosesa tuir lei. Ne’ebé sira fó ona ba kondutór mikrolete no taxi rasik. Iha mikrolete laran mós ami husu ba iha pasajeiru sira tenke tau máskara no kumpre distansiamentu fíziku, nune’e prevene-an nafatin husi COVID-19”, nia akresenta.

Iha  sorin seluk, Taxista António Kui, hateten desde horiseik nia halo fali opersaun hafoin fulan-ida para tanba situsaun Estadu Emerjénsia.

“Ha’u horiseik maka foin halo operasaun. Ha’u tula ema batas ema na’in ida de’it tanba kuandu liu Polísia sei hatun pasajeiru no taxi la halo opersaun tanba tenke kumpre Etadu Emerjénsia”, nia akresenta.

Antes ne’e, Prezidente Repúblika Francisco Guterres ‘Lú Olo’ dekreta Estadu Emerjénsia faze dahuluk no hahú entra ein vigór iha loron sábadu, 28 marsu hahú husi oras 00:00  to’o 26 abríl 2020 oras 23:59, kalan fahe rua (meia-noite) Timor-Leste tama ona iha Estadu Emerjénsia atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun Estadu Emerjénsia períodu daruak ho durasaun loron-30, hahú husi 28 abríl oras 00.00 to’o 27 maiu 2020 oras 23:59.

Nune’e, Governu liuhosi reuniaun Konsellu Ministru aprova Dekretu Governu ba ezekusaun medida Estadu Emerjénsia foun.

Dekretu Governu númeru 3/2020, 29 marsu mantein nafatin proibisaun ba entrada estranjeiru iha territóriu nasionál, maibé eseptu ba estranjeiru ne’ebé presta atividade profisionál iha setór petrolíferu.

Dekretu Governu ne’e mós fó dalan ba atividade transporte públiku sira, maibé ho kondisaun hanesan veíkulu sira tenke fase no hamós loron-loron iha karreta laran antes hahú atividade no mós motorista, tripulasaun no pasajeiru sira tenke uza máskara protesaun no evita kualkér kontaktu fíziku.

Antes ne’e, iha medida Estadu Emerjénsia faze dahuluk laiha movimentasaun ba transporte públiku.

Entretantu, hafoin Timor-Leste rejista kazu pozitivu COVID-19 dahuluk iha 21 marsu 2020, kazu pozitivu ikus liu rejista iha 24 abríl ho totál konfirmadu na’in-24, enkuantu pasiente rekuperadu hamutuk na’in-20 (16 pozitivu no 4 provável) no pasiente ne’ebé sei baixa iha fatin izolamentu Vera Cruz hamutuk na’in-ualu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here