Primeiru-Ministru, Taur Matan Ruak prezide reuniaun Konsellu Ministru, tersa (05/05) iha Salaun Ministériu Finansa, Aitarak-Laran. Imajen Tatoli/António Gonçalves

DILI, 05 maiu 2020 (TATOLI)Ezekutivu sira liuhosi reuniaun estraordinária tersa ne’e aprova ona Dotasaun Orsamentu Temporária (DOT) ba fulan-maiu nian ho montante millaun $114.

“Konsellu Ministru aprova ona DOT ba fulan-maiu nian ho montante millaun $122, ne’ebé inklui emprestimu, maibé bainhira esklui emprestimu entaun hela millaun $114 ne’ebé hanesan montante ba fulan-maiu nian hanesan mós DOT iha fulan-abríl”, relata Ministra Finansa ein ezersísiu, Sara Lobo Brites liuhosi konferénsia imprensa iha Salaun Ministériu Finansa, Aitarak-Laran.

DOT ba fulan-maiu ne’e fahe ba kategoria haat, ne’ebé kompostu husi kategoria saláriu no vensimentu millaun $17,852, bens no servisu millaun $44,894, transferénsia públika millaun $26,591, no kapitál dezenvolvimentu millaun $26,242, esklui kapitál menor.

“Nafatin esklui kapitál menor embora ohin ministériu balun mak aprezenta katak sira iha nesesidade atu selu kapitál menor ba sira-nia akizasaun balun ne’ebé mak halo iha tinan-2019, hanesan Ministériu Justisa iha akizasaun balun ba Prizaun Becora nian, ne’ebé iha tinan kotuk maibé agora empreza foin mak entrega tanba Governu esklui kapitál menor hosi DOT entaun sira seidauk selu to’o agora maibé tanba ita iha ona loron 5 maiu, entaun labele dada bebeik. Tanba ne’e husik ba Ministériu Finansa no Ministériu atu haree hodi atende iha fulan ne’e no fulan oin”, nia adianta.

Atual Vise-Ministra ne’e salienta, iha fulan-maiu sei nafatin aprezenta esesaun ba instituisaun balun ne’ebé mak presiza hodi asegura sira-nia kna’ar durante períodu rejime duodesimál.

“Nafatin iha fulan ne’e (maiu), aprezenta mós esesaun ba instituisaun balun ne’ebé presiza atu asegura sira nia kna’ar hanesan Servisu Autónomu Medikamentu no Ekipamentu Saúde (SAMES). Tanba SAMES presiza iha esesaun atubele abastese ai-moruk no mós Prezidénsia Konsellu Ministru (PCM, siga portugés), inklui Ministériu Obra Públika (MOP) atu asegura konbustível ba jeradór sira, embora iha esesaun maibé montante ne’e mantein nafatin tuir rejime doudésimu um doze avos ba iha progrogasaun orsamentu 2019 nian”, Sara Lobo esplika.

Antes ne’e, tetu orsamentál ba fulan-abríl 2020 iha ámbitu rejime doudesimál ho montante $114.887.000, la inklui empréstimu.

Dotasaun Orsamentu Temporáriu (DOT) ba marsu ho montante $116.449,057, ne’ebé husi totál ne’e fahe ba kategoria saláriu no vensimentu hamutuk $17.852,076, kategoria bens no servisu $38.614,980, transfénsia públika $16.591,048 no kapitál dezenvolvimentu $33.390,953, esklui kapitál menór.

Nune’e mós, aprova DOT ba fevereiru ho montante $116.449,057, ne’ebé totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953.

DOT ba janeiru 2020 ho valór millaun $116, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Utilizasaun rejime duodesimál sura hosi prosesu aprovasaun Proposta Lei OJE 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigór.

Regra no prosedimentu aplikasaun rejime duodesimál, instituisaun Estadu hotu presiza prepara DOT bazeia ba prinsípiu rua mak hanesan dotasaun orsamentál kobre de’it despeza durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define tiha ona tuir Lei Orsamentu Jerál Estadu númeru 13/2016.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here