Luis Roberto, Deputadu Bankada KHUNTO

DILI, 5 maiu 2020 (TATOLI)—Deputadu Bankada KHUNTO no Segundu Vise-Prezidente Parlamentu Nasionál, Luis Roberto, hateten deputadu na’in-tolu hosi bankada KHUNTO asina ona rekerimentu ida hodi halo mudansa ba kompozisaun meza Parlamentu Nasionál.

Deputadu Bankada KHUNTO, Luis Roberto, haktuir iha loron segunda (04 abríl 2020) maizmumenus tuku 15.00, partidu tolu kompostu hosi bankada FRETILIN, PLP no KHUNTO tuur hamutuk hodi ko’alia kona-ba funsionamentu Parlamentu Nasionál nian.

“Loos duni bankada tolu halo ona karta rekerimentu ida bazeia ba rejimentu parlamentu nasionál nian atu rekere ba iha meza parlamentu atu halo mudansa ida ba meza parlamentu. Hosi parte bankada KHUNTO nian deputadu ne’ebé asina ona mak hanesan António Verdiál, António Nobre Nilman no Deputada Olinda Guterres. Ha’u ho Deputada Irene mak seidauk asina maibé orsida ha’u asina ona rekerimentu ne’e,” dehan Luis Roberto ba jornalista sira iha resintu Parlamentu Nasionál, tersa ne’e.

Nia esplika, Deputadu hotu-hotu hosi KHUNTO no partidu rua seluk mós tenke asina hotu tanba tuir rejimentu deputadu na’in 10 mak asina maibé di’akliu ne’e deputadu hosi bankada tolu ne’e tenke asina hotu.

“Mosaun destituisaun ne’e ita atu rekere buat ida funsionamentu Parlamentu Nasionál nian tenke la’o normál nafatin. Tanba, iha semana kotuk ajenda iha maibé Prezidente Parlamentu lakohi ajenda. Ho ida-ne’e mak bankada tolu ne’e kria inisiativa nune’e funsionamentu Parlamentu Nasionál la’o normál nafatin,” nia dehan.

Rekerimentu ne’e, nia hateten, aprezenta ba meza maibé Prezidente Parlamentu atuál lakohi ajenda, vise-prezidente na’in-rua bele substitui bazeia ba rejimentu artigu 17 no artigu 22.

“Iha ne’ebá hatete kuandu prezidente iha preokupasaun ruma tenke iha notifikasaun ba vise na’in-rua hodi foti desizaun tanba vise na’in-rua mós iha kompeténsia lidera konvokatóriu líder bankada hodi fiksa ba ajenda. Ba ha’u pesoalmente brani atu estraga nasaun ha’u ta’uk. Maibé funsionamentu órgaun parlamentu nian ita lalika abandona tanba órgaun ne’e povu nian,” nia hateten.

Tuir ajenda, ohin, tuku 15.00 lorokraik deputadu hosi bankada tolu ne’e konsentra iha sala bankada FRETILIN nian hodi asina rekerimentu ne’e hafoin enkamiña ba meza parlamentu.

“Se prezidente lakohi ajenda, ami na’in rua (vise-prezidente na’in-rua) prontu asume responsabilidade nune’e funsionamentu parlamentu la’o nafatin ba-oin,” hateten Deputadu Luis Roberto.

Jornalista sira tenta konfirma ho Prezidente Parlamentu Nasionál, Arão Noé de Jesus da Costa Amaral, maibé lakohi fó komentáriu.

Notísia Relevante: Bankada PLP, FRETILIN no KHUNTO Sei Hatama Mosaun Destituisaun Hasoru Kompozisaun Meza PN

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here