Administradór Postu Administrativu Dom Aleixo, Tomas Barros. Imajen Tatoli/Domingos Piedade Freitas.

DILI, 04 maiu 2020 (TATOLI)–Administradór Postu Administrativu Dom Aleixo, Tomas Barros informa, aban (tersa, 08 maiu 2020) nia parte sei submete dadus populasaun hosi aldeia 71 hosi suku hitu (7) ne’ebé pertense ba Postu Administrativu Dom Aleixo ba Autoridade Munisípiu Dili (AMD) hodi bele simu subsídiu hosi Governu

Nia hatutan, autorizasaun rekolla dadus ne’e bazeia ba sirkulasaun hosi Ministeriu Administrasaun Estatál (MAE) liuhosi Prezidente Autoridade Munisípiu Dili, iha loron 27 abril 2020 ho horas 09:00 OTL, iha reuniaun Administradór Postu Administrativu neen (6) hanesan Atauro, Metinaro, Vera Cruz, Nain Feto, Kristu Rei no Dom Aleixo ho autoridade Munispiu Dili, kona-ba orientasaun foti dadus hosi komunidade sira-nian ligadu ho surtu COVID-19 iha Timor-Leste.

“Aban, ha’u sei submete populasaun sira-nia dadus ba Autoridade Munisípiu Dili. Mekanizmu ne’ebé mak ita uza atu foti dadus mak hanesan kartaun eleitorál no ficha família hosi komunidade ne’ebé mak hela iha kada aldeia ou kada suku. Ita bele dehan katak komunidade ne’ebé mak hela permanente no komunidade ne’ebé mak hela provizoriu ka temporáriu mak sira ne’ebé mak aluga ema-nia uma (kost), hodi eskola no buka moris mós iha Dili mós nu’udar sidadaun Timor-Leste,” dehan Tomas Barros ba Ajénsia TATOLI liuhosi entrevista iha nia knaar fatin, foin lalais ne’e.

Ba asuntu ida ne’e, nia parte bolu kedas Xefe Suku na’in hitu (7) hodi halo enkontru ida ho objetivu atu hato’o informasaun ne’ebé mak simu hosi Ministériu Administrasaun Estatal liuliu kona-ba sirkulár ne’ebé mak hetan hosi Ministéiu Administrasaun Estatál atu foti komunidade sira-nia dadus.

“Ha’u hanoin orientasaun la’o tuir hosi kritéria sirkulár hosi Ministériu Administrasaun Estatál nian katak foti dadus hanesan hosi komunidade ne’ebé mak rezidente permanente inklui mós ba komunidade sira ne’ebé mak hela temporáriu

Tanba, nia dehan, Governu mós iha responsabilidade ba komunidade sira ne’ebé hela temporáriu atu tau matan ba sira hanesan mós komunidade sira ne’ebé hela permanente. Ho buat hirak ne’e, tuir nia, Governu sei la halo diskriminasaun maski ho mekanizmu ne’ebé mak la hanesan uitoan.

Nia dehan, tuir loloos prosesu hirak ne’e sei ramata iha loron 01 maiu 2020 tuir primeiru mandatu nian. Maibé haree hosi tempu limitadu tebe-tebes, nune’e mak hosi parte autoridade hosi autoridade muníspiu atu fó tan tempu hodi rekolla dadus. Tanba komunidade ne’ebé mak hela iha Postu Administrativu Dom Aleixo ne’e barak tebe-tebes, se lae, dadus labele rekolla hotu.

“Ho razaun ne’e mak hosi parte Dom Aleixo husu atu muda fali ba iha loron 08 maiu 2020 mak finaliza no bele submete ba Prezidente Autoridade Munisípiu Dili. Ha’u hanoin hosi Dom Aleixo nian fó tempu ba aldeia 71 no suku 7 to’o de’it iha loron 06 maiu 2020, halo rekapitulasaun ba dadus sira hotu sai ida de’it hodi relata ba Autoridade Munisípiu Dili mak hatutan ba Ministériu Administrasaun Estatál,” nia dehan.

Nia informa, totál populasaun hosi Postu Administrativu Dom Aleixo nian provizoriu hamutuk 50 mill eleitór maibé mudansa hosi tinan ida ka rua nia laran ba kotuk, joven sira forma família mós barak tebe-tebes entaun dalaruma númeru eleitór sira bele liu ida ne’e ona.

“Ha’u mós orienta ona ba iha Xefe Aldeia no Xefe Suku sira atu labele halo manipulasaun ba dadus hirak ne’e. Tanba Estadu liuhosi ministériu relevante sira sei halo verifikasaun,” nia dehan.
Tamba ne’e, nia parte sempre dehan ba Xefe Suku sira labele uza oportunidade situasaun COVID-19 nian no sai hanesan biban ida atu hetan buat ruma ne’e la di’ak tanba Estadu Emerjénsia la’os de’it ba munisípiu ka postu balun de’it.

“Populasaun um millaun itál Timor laran tomak iha direitu hanesan. Tanba ne’e mak kontinua ejize no husu ba Xefe Suku sira atu kuidadu didi’ak ho momoos atu lalika gasta osan boot liu ba manipulasaun de’it” nia esplika.

Jornalista : Domingos Piedade Freitas

Editór      : Cancio Ximenes

HAKEREK NO HATÁN

Please enter your comment!
Please enter your name here