Komandante PNTL Munisípiu Dili, Superintendente Xefe, Armando Monteiro ho Segundu Komandante, Superintendente Euclides Belo. Imajen/Eugénio Pereira

DILI, 02 maiu 2020 (TATOLI) -Polísia Nasionál Timor-Leste (PNTL) Munisípiu Dili serbisu hamutuk ho Komandu FALINTL-Forsa Defeza Timor-Leste F-(FDTL) hosi Unidade Polísia Militár (PM) estabelese ona “postu operasaun” haat (4) iha Dili hodi halo operasaun auto stop ka pasa revista rutina ba movimentu transporte ne’ebé tama-sai Dili.

Postu operasaun seguransa provizóriu ne’ebé harii ona maka iha área Benvindo Tasi-Toli, Mota-Ulun Manleuana, Lahane, no Fatu-Ahi área Becora nian.

Komandante PNTL Munisípiu Dili, Superintendente Xefe, Armando Monteiro, sábadu (02/05/2020), liuhosi konferénsia imprensa iha Komandu PNTL Munisípiu Dili, informa, ekipa seguransa hosi F-FDTL ho PNTL sei halo pasa revista ba kualkér transporte públiku ne’ebé halo movimentu tama-sai Dili atu labele lori sasán kro’at no halo sensibilizasaun ba populasaun atu kumpre regra  Estadu Emerjénsia, liu-liu distansiamenut sosial, distansiamentu fíziku no uza máskara.

“Ami harii ona postu seguransa vijilánsia haat hodi kontrola movimentu transporte no ema hosi kapitál Dili atu ba munisípiu no hosi munisípiu mai Dili,”  hateten Komandante Armando Monteiro

Daudaun ne’e, membru polísia efetivu hamutuk na’in-257 maka koloka iha postu seguransa provizóriu sira no polísia na’in-82 liu halo seguransa iha kuarentena sia (9) iha Dili.

PNTL Dili mós hetan apoiu seguransa husi Unidade Patrullamentu Fronteira (UPF) ne’ebé destakadu iha Aeroportu no Unidade Polísia Marítima ho Polísia Militár.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here