ATAURO, 02 maiu 2020 (TATOLI)-Governu liuhosi Ministériu Saúde Ekipa Pilár Segundu hamutuk ho ekipa Prezidente Autoridade Munisípiu Dili, ohin, halo sosializasaun públiku iha Postu Administrativu Atauro, Munisípiu Dili, kona-ba medida prevensaun surtu Coronavirus ka COVID-19.
Atividade sosializasaun no sensibilizasaun ne’e hala’o iha Merkadu Beloi Atauro ne’ebé partisipa hosi populasaun Atauro no akompaña mós hosi Prezidente Autoridade Munisípiu Dili, Gaspar Soares,Vise Kordenador Pilar Segundu hosi Ministériu Saúde, Ivo da Conceção Freitas, parseiru dezenvolvimentu sira hanesan KOICA, Mercy Corps, Krús Vermella Timor-Leste (CVTL) no seluk-tan.
Prezidente Autoridade Gaspar Soares hateten, sensibilizasaun ne’e atu bolu atensaun ba komunidade Atauro atu kontinua halo prevensaun ba problema saúde públika COVID-19 ne’ebé ohin loron mundu enfrenta inklui Timor-Leste, nune’e mós, surtu dengue ne’ebé númeru kazu aumenta beibeik iha Timor-Leste.
Nia husu komunidade Atauro atu kumpre medida prevensaun ne’ebé haktuir ona hosi Ministériu Saúde no Organizasaun Mundiál Saúde (OMS), mak hanesan mantén distánsia sosiál no distánsia fizíku, fase liman ho sabaun beibeik, hakmatek iha uma no bainhira la’o sai tenke uza máskara.
Ba prevensaun surtu denge, Gaspar Soares, husu atu komunidade labele soe fo’er arbiru, hakoi kalén-aat, aruma roda ne’ebé soe arbiru, hamoos uma-oin no laran no toba uza moskiteiru.
“Saúde iha liman rasik, ita hotu fó kontribuisaun hodi kombate surtu rua nee iha ita-nia rain no ita-nia sosiedade,” afirma Gaspar Soares.
Nia mós husu ba Administradór Postu Atauro atu koordena ho lider komunitáriu no parte saúde atu kontinua halo sensibilizasaun ba komunidade hodi tama-sai atu komunidade bele informadu kona-ba medida sira prevensaun surtu COVID-19 ho surtu denge.
Iha faint hanesan, Diretór Nasionál Finansas hosi Ministériu Saúde, Marcelo Amaral hateten, dezde inisiu hosi fulan janeiru to’o ohin loron, Ministériu Saúde halo esforsu lubuk ona hodi halo prevensaun, liu-liu ba maluk timoroan sira ne’ebé foin fila hosi nasaun afetadu atu obrigatóriu kumpre kuarentena obrigatóriu.
Daudaun ne’e, nia informa, Timor-Leste rejista kazu konfirmadu COVID-19 na’in-24, rekupera ka kuradu na’in-20. Tanba ne’e, komunidade no entidade hotu tenke kontribui atu hamutuk luta kontra inimigu invizivel ne’e iha Timor-Leste.
Administradór Postu Atauro, Mateus Belo, lori komunidade Atauro nia-naran hato’o agradese ekipa Ministériu Saúde ho Autoridade Munisípiu Dili, inklui ajénsia internasionál ho nasionál sira ne’ebé halo esforsu hotu hodi hakat to’o Atauro hodi fahe informasaun ba komunidade kona-ba oinsá halo prevensaun ba surtu COVID-219 ho surtu denge.
“Antes ne’e ami iha Atauro koordena ho Sentru Saúde Atauro hodi halo ona sosializasaun ba medida prevensaun COVID-19 no espera liuhosi sensibilizasaun ohin bele tulun liu tan ami,” hateten Mateus Belo.
DNSA ho Parseiru Monta Tanke Bee-Moos Neen
Liuhosi sensibilizasaun ne’e, Diresaun Nasionál Saneamentu no Agua (DNSA) ho parseiru dezenvolvimentu KOICA monta mós tanke (profile) neen (6) hodi iha Merkadu Belo ho Sentru Saúde Atauro hodi fasilita komunidade sira fase liman molok tama ba merkadu no sai hosi merkadu, inklui molok tama ba Sentru Saúde no depois sai hosi Sentru Saúde.
Jornalista : Nelson de Sousa
Editór : Francisco Simões
