Portavóz CIGC no Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 02 maiu 2020 (TATOLI)–Koordenadór ofisiál Ligasaun Forsa Tarrefa no Portavóz Sala Situasaun Centro Integrado Gestão Crise (SS-CIGC), Rui María de Araújo hateten, entrada hosi fronteira terrestre kontinua suspensu, hafoin Prezidente Repúblika Francisco Guterres “Lú Olo” deklara suspende Estadu Emerjénsia to’o fulan maiu nia rohan. 

“Hakarak informa ba públiku katak entrada hosi fronteira terrestre nafatin suspensu. Ida ne’e sei ajuda forsa-tarefa sira hotu ne’ebé envolvidu iha atividade prevensaun no mitigasaun COVID-19 atu konsentra esforsu sira iha semana tolu tuir mai, hodi buka deteta kazu iha komunidade nia le’et, karik iha duni ona,” dehan Portavóz Rui Maria Araújo durante atualiza númeru kazu COVID-19 iha Timor-Leste iha Centro Convenções Dili, Merkadu Lama, Dili, sábadu ne’e.

Aleinde ne’e, SS-CIGC informa mós ba públiku katak medida Estadu Emerjénsia relasiona ho distansimentu sosiál, distansiamentu fiziku, utilizasaun máskara, no ijiene pesoál, sei nafatin hanesan períodu Estadu Emerjénsia ida ne’ebé liu tiha ona.

Hatán ba sidadun timoroan balun ne’ebé tama ilegálmente, nia hateten, bainhira Governu deside suspende entrada sira iha fronteira terreste, sidadaun timoroan sé de’it mak tama klandestina, liuhosi informasaun hosi komunidade ka lider komunitária sira, ema hirak ne’e tenke tama kuarentena ne’ebé superviziona hosi Ministériu Saúde no mós jere hosi Ministériu Turizmu Komérsiu no Industria.

Notísia Relevante: Totál Kumulativu Kazu Konfirmadu COVID-19 iha TL Nafatin 24

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here