DILI, 16 marsu 2020 (TATOLI)—Diretór Jerál SEPS Xefe Polisia Ismael da Costa Babo informa, Sekretária Estadu Protesaun Sivil (SEPS) estabelese ona ekipa 12 hodi halo identifikasaun dadus ba komunidade sira ne’ebé afetadu hosi inundasaun (lalubur) iha bairru ne’ebé hetan afetadu hosi dezastre naturál.
“Iha momentu akontese, ekipa ne’en maka halo identifikasaun maibé horisesehik aumenta tan ekipa balu ho totál ekipa 12 para bele halo identifikasaun dadus ba bairru sira,” dehan Xefi Polisia, Ismael da Costa Babo, ba jornalista sira iha nia knar fatin, Caicoli, Dili, ohin.
Diretór ne’e afirma, daudaun ne’e serbisu la’o hela nune’e, SEPS seidauk iha relatóriu kona-ba dadus kompletu maibé provizoriamente SEPS iha ona dadus ba uma kain ne’ebé hetan stragus nune’e mós pesoal ne’ebé afetada.
“Dadus provizoriu ne’e uma kain porvolta 1.000 maka hetan estragus no pesoál afetada ne’e hamutuk ema na’in 3.000 inklui bebé, ferik-katuaa no klosan, maibé dadus kompletu liu sei informa uainhira konklui ona,” nia dehan.
Diretór SEPS ne’e mós hateten, apoiu ne’ebé hala’o ona mak hanesan apoiu evakuasaun ba vítima sira, aleinde apoiu operasaun ne’ebé halo ba salva vitima sira-nia vida hafoin apoiu emerjénsia ba vitíma sira.
“Ajuda ne’ebé ami halo maka hanesan ajuda humanitáriu hanesan hahan, sasan dapur, ne’ebé maka ekipa sira balu identifika komplete ona hanesan iha Hera. Maibé iha área seluk seidauk tanba dadus seidauk kompletu,” nia dehan.
Iha fatin hanesan Xefi Polisia Ismael da Costa Babo dehan operasaun seluk ne’ebé halo maka normaliza konetividade públiku atu lao ho normal fila fali.
“Ami koordena ho liñas ministeriál sira hotu no ami foka liu atu normaliza konetividade públiku, hanesan EDTL, Obras Públikus, Edukasaun, Autoridade lokál sira, no populasaun sira komesa loke no hamoos dalan para konektividade públiku la’o ho normál,” nia haktuir
Relasiona ho uma komunidade nian ne’ebé barak hetan stragus grave hosi inundasaun refere, Xefe Polisia ne’e realsa, sei haree fila fali ba orsamentu atu nune’e bele tau atensaun hodi rekopera fila fali komunidade sira ne’ebé hetan stragus makaas.
“Kona-ba rekoperasaun ita sei haree fali ba orsamentu, para ita propoen ba nai ulun sira, atu tau atensaun ba rekoperasaun ita-nia komunidade sira, para rekupera fali sira-nia uma sira ne’ebé at. Estragus kmaan ka todan tuir kriteria politíka nasionál ba jestaun risku dezastre atu nune’e ita bele fó apoiu,” nia hateten.
Entretantu Komunidade ne’ebé simu ona ajuda humanitária hosi SEPS, tuir dadus provizoria hamutuk 198 komunidade iha Hera, 21 iha santa krus, Bidau Santana iha família 15 no iha área seluk seidauk iha dadus kompletu tanba sei halo identifikasaun.
Notísia Relevante:
Jornalista : Nelia Borges
Editór : Cancio Ximenes
