Servisu Tékniku DNSA iha terrenu. Imajen/SAS

DILI, 17 marsu 2020 (TATOLI)Komunidade iha  Bairro Becuse Sentru, Suku Becora, Postu Administrativu Cristo Rei, la asesu bee moos dezde udan-boot ne’ebé akontese iha sesta (13/03) no hamosu inundasaun iha parte Leste no Sentru kapitál Dili, nune’e abitante sira husu Servisu Agua no Saniamentu (SAS) hadi’a kanalizasaun bee-moos.

Komunidade Aldeia Becuse Sentru, Suku Becora, Jorge Nelson, haktuir hahú husi sesta hafoin udan-boot hamosu inundasaun no komunidade iha parte Becuse kuaze la asesu bee-moos.

“Ami iha ne’e bee araska loos no bee tama ami-nia uma maibé atu fase no hamoos sasán ida kona rai-u’ut la di’ak tanba bee laiha”, tenik Jorge Nelson ba Agência Tatoli iha Becuse, tersa ne’e.

Nia rekoñese, kauza inundasaun mak sobu hotu bee-kanu sira, tanba ne’e nia husu SAS atubele hadi’a nesesidade ba komunidade sira.

“Ami iha ne’e komunidade balun hola inisiativa hodi sosa bee rasik, maibé ohin dader bee tuun ona maibé oituan de’it”, nia akresenta.

Iha sorin seluk, Estudante Anina Pinto, husu ba SAS atu esforsu-an hadi’a instalasaun kanu-bee sira atu komunidade sira bele asesu bee-moos.

“Ami husu SAS hadi’a kanu sira atu komunidade bele asesu bee atubele fase uma-laran”, nia sujere.

Komunidade iha área Becora, hahú husi sesta to’o ohin loron seidauk asesu ba bee-moos ne’ebé difikulta tebes nesesisade loron-loron hodi fase rai u’ut no taho sira ne’ebé nakonu uma-laran.

Primeiru-Ministru, Taur Matan Ruak orienta ona MOP liuhusi  Diresaun Jerál Água no Saneamentu (DGAS, sigla portugés) liuhosi ekipa Task Force Diresaun Nasionál Servisu Água (DNSA) hodi kontinua apoiu fornese bee-moos ba komunidade inundasaun iha área Becuse, Taibesi no área sira seluk ne’ebé hetan inundasaun no kontinua hadi’a kanu instalasaun bee-moos sira ne’ebé hetan estragu tanba impaktu husi inundasaun iha loron hira liubá atu komunidade bele asesu bee-moos.

Governu liuhosi ministériu kompetente kontinua esforsu-an husi servisu hamutuk ho komunidade sira hodi rezolve volume lixu ne’ebé aas impaktu husi inundasaun.

PM Taur konvoka ona enkontru ho Konsellu Administrativu Fundu Infraestrutura (CAFI, sigla portugés) atu haree lalais fundu kontejénsia hodi nomaliza, fó ajudu, proteje komunidade sira ne’ebé hetan inundasaun no kontinua apoiu halo limpeza iha área sira ne’ebé hetan estragu.

Governu liuhusi MOP, Sekretáriu Estadu Protesaun Sívil (SEPS), Bombeiro, Ministériu Solidariedade Sosiál no Inkluzaun (MMSI), no parte interministeriál ne’ebé liga ba dezastre naturál kontinua servisu maka’as apoiu komunidade sira iha área ne’ebé hetan inundasaun.

Jornalista: Florencio Miranda Ximenes

Editora: Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here