DILI, 16 marsu 2020 (TATOLI) – Primeiru-Ministru (PM), Taur Matan Ruak, akompaña husi Ministru Obra Públika, Salvador Soares dos Reis Pires, iha segunda lorokraik molok fila ba ninia rezidénsia, halo observasaun direita área afetadu inundasaun, liuliu ponte tolu hanesan Ponte My Friend (Balide), Ponte Becusse, no Ponte Maufelu (Becora), ne’ebé sai kauza hamosu inundasaun iha sesta (13/03).
“Ponte tolu ne’ebé sai kauza hamosu inundasaun ne’e tanba entupidu hosi material lixu ne’ebé mota lori, hodi bee halai ses fali ba komunidade nia hela fatin”, haktuir nota ne’ebé Agência Tatoli asesu.
Daudaun ne’e, Governu liuhosi Ministériu Obras Públika (MOP) orienta Institutu Jestaun Ekipamentu (IGE-sigla portugés) hodi hatún ekipamentu pezadu, hodi hasai matéria sendimentasaun ne’ebé entupidu, aleinde ne’e hasai taho ne’ebé taka estrada sira hodi normaliza filafali movimentasaun estrada.
Hafoin observa ponte tolu, Xefe Governu hateten, presiza projetu emerjénsia hodi ajuda serbisu IGE nia para normaliza mota sira tanba ekipamentu pezadu de’it la to’o.
“Ha’u ho Ministru Obras Públika haree hela, daudaun ne’e iha ekipamentu pezadu de’it, ha’u hanoin ekipamentu pezadu de’it ne’e la aguenta, tanba ita-nia reseiu, se ita la rezolve lalais problema bele pior liu kuandu udan. Tanba ne’e ami haree buka dalan nusa mak projetu emerjénsia ruma, uza kompañia privadu sira para bele normaliza lalais mota sira ne’e”, PM Taur adianta.
Jornalista: Antónia Gusmão
Editora: Julia Chatarina