DILI, 16 marsu 2020 (TATOLI) – Ministru Koordenadór Asuntu Ekonómiku interinu, Fidelis Manuel Leite Magalhães, hateten nia parte simu informasaun husi parte Sentru Lojístika Nasionál (CLN, sigla portugés) katak fó ona apoiu Fós saka 1.000 ba vítima inundasaun.
“Inundasaun foin lalais ne’e, CLN responde fós saka rihun ida ba situsaun emerjénsia ne’ebé akontese iha fim de semanane’e, hodi ajuda ba ita-nian komunidade sira ne’ebé afeta ba inundasaun”, tenik Ministru Fidelis ba Agência Tatoli, iha ninia knaar fatin, Palásiu Governu, segunda ne’e.
Tuir atuál Ministru Reforma Lejizlativa no Asuntu Parlamentár ne’e, Governu iha papél boot hodi asegura ninia povu bainhira hetan inunsaun ka hetan problema emerjénsia sira.
“Tanba ne’e maka iha kazu inundasaun ne’e, Governu liuhusi CLN rasik apoia ita-nian vítima inundasaun sira”, nia adianta.
Jornalista: Natalino Costa
Editora: Julia Chatarina