Imajen Tatoli/Osória Marques

DILI, 12 marsu 2020 (TATOLI)–Diretora Organizasaun Plan internasionál Timor-Leste, Dyliana Daten Ximenes hateten, eroina no eroi barak iha Timor-Leste mak durante ne’e halo mudansa ne’ebé mak liga ho asuntu igualdade.

“Ohin, ami identifika eroina ho eroi sira hamutuk 12 ne’ebé durante ne’e halo mudansa ba sira-nia papél loron-loron. Ohin, ita hotu haree ne’e sai hanesan apresiasaun no sai hanesan mós modellu ba kampiaun mudansa ba ita-nia labarik sira,” dehan Diretora Plan internasionál ba ajénsia TATOLI iha Palásiu Nobre Lahane, Dili, kinta (12/3/2020).

Nia hatutan, liuhosi modellu ne’ebé mak eroina no eroi sira hatudu ohin katak labarik feto no foinsa’e feto sira tenke fiar-an no estuda di’ak no makaas atu atinje sira-nia mehi.

Entretantu, manan na’in premiu ba mudansa iha TL, Maria Natércia Gusmão Pereira dehan, nia kontente bainhira nia rona informasaun husi júri katak nia mós sai eroina ba mudansa ba servisu loron-loron nian.

“Ha’u sente kontente. Bainhira ha’u simu informasaun hosi júri katak ha’u mós manan na’in ba eroina mudansa nian. Ha’u sente katak iha vida professional, sin, ha’u halo buat barak dezde iha tinan 2000 to’o agora hanesan juíza,” nia haktuir.

Mudansa partikularmente, nia dehan, nia parte halo ona buat barak maibé mudansa ba nasaun nian,  nia dehan seidauk halo buat barak.

“Ha’u halo mudansa partikularmente iha ha’u-nia nia moris ne’e barak ona. Maibé mudansa ba nasaun nian, ha’u hanoin katak ha’u seidauk halo buat barak,” nia haktuir.

Atuál juiza iha Tribunal Rekursu ne’e hateten, nia hala’o nia knaar hanesan juíza durante tinan 20 ona ho esperiénsia ne’ebé mak zero mai to’o agora sai forte.

“Ha’u hala’o ha’u-nia knaar hanesan juíza durante tinan 20 ona maibé hahú husi esperiénsia zero to’o agora dehan ha’u sai forte. Tanba, ha’u iha vontade atu aprende, estuda makaas no ida ne’e mak as tebes iha ha’u-nia moris,” nia hateten.

Manan na’in eroina ba mudansa iha TL ne’e informa, ba jovén sira liuliu ba labarik feto sira primeiru mak kultura estuda tanba liuhusi estuda mak sai matenek no sai fatór ida ne’ebé indispensáveis.

Liuhusi edukasaun, nia esplika, mak feto sira bele determina saida mak sira bele halo iha futuru, liuliu ba jovén sira ne’ebé frekuenta hela sira-nia estudu.

Tanba ne’e, nia hatutan, labele hanoin de’it foti diploma iha fakuldade direitu nian maibé tenke tenta mós atu aprende matéria hotu liuliu prinsípiu jerais bainhira simu knaar ruma labele iha difikuldade.

Eroina no eroi ne’ebé saí manan na’in ba mudansa iha TL ne’ebé liga ho asuntu igualdade jéneru ba servisu loron-loron nian hamutuk na’in 12 mak hanesan Domingas Alves (Bilou-Mali), Helena Dias Quintas Monteiro, Padre João Soares, Virna Maria dos Reis Martins, Isabel Antónia da Costa Galhos, Fundasaun Grupu Kultura Le-Ziaval, Maria Natércia Gusmão Pereira, Lourdes Lobato, Diária Ximenes, Manuela da Silva Caldas, Silvia Antónia da Costa Soares no Domingas Agusta Fátima Freitas.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here