Primeiru-Ministru, Taur Matan Ruak. Imajen Tatoli/ Egas Cristovão

DILI, 14 marsu 2020 (TATOLI) – Primeiru Ministru (PM), Taur Matan Ruak, hato’o sentidu kondolénsia no solidaridade ba família vítima  sira, hafoin udan-boot ne’ebé akontese iha sesta lorokraik kuaze oras haat nia laran iha Kapitál Dili no hamosu inundasaun forte kuaze iha kapitál laran iha parte Sentru no Leste nian.

“Ha’u preokupa oituan ho ita-nia sidade, hafoin udan horisehik ne’ebé afeta tebes ba komunidade sira, inklui eskola sira. Lori ha’u ninia naran rasik, manifesta isolidaridade ba komunidade sira ne’ebé afetadu. Manifesta mós sentidu kondolénsia ba família ne’ebé konfirmadu lakon oan-ida ka mate iha Rua Vera Cruz”, tenik PM Taur iha Salaun Catedral Vila-Verde, sábadu ne’e.

Ho nune’e, Eis Prizdente Repúblika ne’e orienta Ministru Obra Públika, Salvador Eugênio Soares dos Reis Pires no Sekretáriu Estadu Protesaun Sivíl, Alexandrino de Araújo, hodi observa direta ba terenu hodi halo evakuasaun emerjénsia ba vítima sira ne’ebé afetadu maka’as ba inundasaun.

“Ita fó garantia ba komunidade afetadu sira katak Governu ho esforsu tomak fó apoia nesesáriu ruma ba sira”, akresenta Xefe Governu.

Tuir nota ne’ebé Agência Tatoli asesu hosi Gabinete Primeiru-Ministru relata, área sira ne’ebé afetadu maka’as mak hanesan Becora, Becusse, Bidau, Bemori, Caicoli, Maloa no Prezidénsia Repúblika.

Enkuantu Ministru Salvador iha sesta kalan hafoin udan maka’as, tun direita hodi halo observasaun ba fatin sira-ne’ebé hetan estragu maka’as hodi orienta Institutu Jestaun Ekipamentu (IGE-sigla portugés) atu halo normalizasaun lalais ba fatin sira-ne’e, nune’e movimentasaun bele la’o ho normal filafali.

Hosi dezastre naturál ne’e, mota lori ema na’in- 5, na’in-ida konfirmadu mate ona no rua seluk seidauk hetan no na’in-3 konsege salva lori halai ba Hospital Nacional Guido no Valadares (HNGV).

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here