Imajen Espesiál

DILI, 14 marsu 2020 (TATOLI)—Partidu Frente Revolucionaria de Timor-Leste Independente (FRETILIN), ohin, realiza Konferénsia Nasionál ba dala-IV ho tema ho tema “Aprofundar a aliança com o Povo e Garantir a Contrução e a unidade da nação”  hodi hametin liután aliansa ho povu no garante kontrusaun nasaun nian.

“Ohin, ita halibur iha fatin ida-ne’e, ita halibur ho laran taridu tebes tanba susar oin-oin tama iha ita-nia rai doben Timor-Leste, susar hada’et ba idak-idak nia moris, hodi hametin liután FRETILIN nia aliansa ho povu iha rai ida-ne’e,” dehan Sekretáriu Jerál FRETILIN, Marí Alkatiri, iha ninia intervensaun iha Salaun Parokiál Igreja Katedral, Vila Verde, sábadu ne’e.

Sekretáriu Jerál FRETILIN ne’e preokupa tanba maluk oituan de’it mak hetan kualidade moris di’ak liu maibé povu maioria moris hakdasak nafatin.

Eis Primeiru-Ministru ne’e haktuir, tinan 18 ba kotuk restaura ita-nia independénsia, hosi 2007 to’o agora, fakar osan rezultadu laiha hodi dada osan hosi tasi-mane dudu ba tasi-feto.

“Haburas ekonomia mak bele hametin soberania. At liután bainhira ita la haburas ekonomia maibé haburas fali tusan hodi halo ekonomia namlaek. Wainhira ekonomia namlaek, soberania mós namlaek hotu. Ita presiza duni muda situasaun tomak. Ita presiza hadi’a kualidade povu moris maioria nian. Atu hahú hosi ne’ebé no saida mak la’o naksalak to’o agora,” nia dehan.

Alkatiri afirma, krize ida-ne’ebé mosu iha ita-nia rain bolu krize sistema, sistema atu harii, tenke iha definisaun polítika nasionál ne’ebé pro povu

“Tanba ita Haree ba kualidade moris tuir prinsípiu atu garante sustentabilidade dezenvolvimentu nasionál, ita tenke garante moris di’ak liu ba ita-nia jerasaun aban-bainrua nian, ne’e hanesan prioridade boot ba ita. Ita define ita-nia prioridade tuir vizaun ida-ne’e, nune’e atu hadi’a kualidade moris tenke hahú hodi saúde inan no oan nian,” Sekretáriu Jerál FRETILIN ne’e hateten.

Konferénsia Nasionál FRETILIN ne’e partisipa hosi estrutura nasionál no munisipál no mós partidu seluk hanesan PLP, PD no KHUNTO.

Jornalista : Evaristo Maratins Soares

Editór      : Cancio Ximenes

HAKEREK NO HATÁN

Please enter your comment!
Please enter your name here