Ró Kruzeiru ne’ebé mai vizita Timor-Leste. Imajen/Espesiál

DILI, 13 marsu 2020 (TATOLI) – Governu liuhhosi Ministériu Turismu, Komérsiu no Industria (MTKI) deside kansela ró kruzeiru husi Austrália vizita Timor-Leste, relasiona ho sirkulasaun Coronavirus ka COVID-19.

Tanba ne’e, MTKI realiza enkontru interministeri ne’ebé kompostu hosi MTKI rasik, Polísi Nasionál Timor-Leste (PNTL), Unidade Polísia Máritima (UPM), Serbisu Migrasaun, Autoridade Portuariu Timor-Leste (APORTIL), Ministériu Saúde (MS), Diresaun Nasionál Kuarentena no Bioseguransa, no ajénsia sira ne’ebé servisu hamutuk ho ró kruzeiru.

Diretór Jéral MTKI, José Quintas, informa enkontru ho entidade sira-ne’e hodi fahe informasaun no mós koordenasaun kona-ba vizita ró kruzeiru mai hosi rai-li’ur.

“Hó isu globál kona-ba Coronavirus ami hato’o karta ba Ministru Turismu, Komérsiu no Industria interinu, relasiona ho asuntu ne’e maka ami-nia ministru foti desizaun ida temporáriamente adia ró kruzeiru vizita Timór tanba iha relasaun ho saúde públiku ne’ebé importante tebes ba ita, tanba atividade ekonomia la’o bainhira ita-nia saúde di’ak”, hateten Diretór Jéral MTKI ne’e liuhusi konferénsia imprensa iha salaun Sentru Konvensaun Dili (CCD, sigla portugés), sesta ne’e.

Tuir José Quintas katak iha loron 8 marsu liubá iha ró kruzeiru vizita Timór, maibé hosi Indonézia no Singapura la autoriza ona entaun ró refere sira kansela. Ho ida-ne’e vantajen mós ba Timor-Leste hodi evita Coronavirus.

Nia argumenta haree ba fasilidade Timor-Leste nian ne’ebé mínimu tebes, kompara ho nasaun sira seluk. Tanba ne’e maka halo kansela atu evita virus refere mai Timór.

“Ministériu relevante fó apoia tomak ba desizaun ne’ebé maka foti ba adiamentu ne’e. Maibé iha parte seluk mós ami simu ona informasaun hosi ajénsia sira ne’ebé koordena ho ró sira ne’e katak provizória sira adia vizita mai Timór bainhira situasaun normál ka Coronavirus ne’e laiha ona mak sira foin bele mai fali no balun mós dehan katak 2021 ne’e maka bele mai fali vizita Timor-Leste”, nia subliña.

Dirijente ne’e relata, iha nasaun seluk hanesan Japaun, Tailándia, Filipina no Indonézia rasik la-autoriza ona ró kruzeiru vizita sirania nasaun.

Adjuntu Komandante UPM, Inspetór Xefi João Cesar da Silva, hateten hosi parte seguransa nian apoia tebes desizaun Governu nian tanba haree ba asuntu Coronavirus ne’e henesan  problema mundiál tanba ne’e presiza tebes atu tau atensaun.

Maibé adjuntu komandante ne’e sujere ba Governu, liuliu Ministériu Saúde atu tau pesóal saúde iha Portu Dili, nune’e bele halo teste ba pasajeiru sira ne’ebé maka tama sai ho ró ki’ik.

“Ami apoia tomak desizaun ne’e no ami prontu atu koopera ho instituisaun ne’ebé de’it, atu asegura di’ak liután seguransa ba ita-nia rai no povu”, dehan João Cesar da Silva.

Diretór Nasionál Farmásia no Medikamentu, Alipio Gusmão Lopes, realsa kestaun COVID-19 ne’e kestaun importante tebes tanba ne’e hosi parte MS nian agradese tanba MTKI deside kansela ba vizita ró mai ita nia rain.

“Desizaun ida kansela ró mai iha Timor ha’u hanoin ne’e di’ak tebes tanba ita haree ba COVID-19 hanesan haree ba nasaun. Ita haree ba oinsá atu kontribui, nune’e ita nia nasaun sai nafatin nasaun ne’ebé protejidu hosi virus ne’e”, nia argumenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here