Vise Xefe Bankada Parlamentár PLP, Francisco de Vasconcelos. Imajen/ Egas Cristovao.

DILI, 12 marsu 2020 (TATOLI)—Partidu Libertasaun Populár (PLP), konsidera koligasaun foun ne’ebé indijita primeiru-ministru (PM) foun laiha baze legál tanba kompozisaun meza Parlamentu atuál seidauk iha mudansa.

Vise-Xefe Bankada Parlamentár PLP, Francisco Vasconcelos, observa koligasaun foun hasoru Prezidente Repúblika no prezidente haruka sira halo deliberasaun, ne’e aumenta tan konfuzaun boot ida tanba CNRT mantein koligasaun anteriór no aumenta tán koligasaun foun, ne’e solusaun laiha ida.

“Ita hotu hatene koligasaun foun ne’e indijita Primeiru-Ministru ne’e viola tiha artigu 108 konstituisaun. Sira tenke komprova no hatudu ba Prezidente Repúblika katak partidu maioria mak ida-ne’ebé, tenke sei iha maioria ida bele indijita Primeiru-Ministru. Artigu 106 ne’e Primeiru-Ministru indijita hosi partidu mais votadu no forma Aliansa Maioria Parlamentár, agora meza Parlamentu Nasionál V Lejizlatura ne’e kompostu hosi CNRT, PLP, KHUNTO NO UDT/FM,” dehan Francisco Vasconcelos ba jornalista sira liuhosi konferénsia imprensa iha sala bakada PLP, iha Parlamentu Nasionál, kinta ne’e.

Nia afirma, ne’e hatudu katak koligasaun foun ne’e tenke halo destituisaun ba meza Parlamentu Nasionál hafoin fó garantia ba prezidente katak iha maioria ida hodi indijita Primeiru-Ministru.

“Se meza Parlamentu seidauk rezolve halo nusá mak sira indijita Primeiru-Ministru. Ne’e ba PLP katak tentativa golpe Estadu tanba ita labele indijita Primeiru-Ministru ke Primeiru-Ministru seluk sei iha. Tanba ita-nia regra jurídika Timor-Leste nian laiha definisaun ida kona-ba Governu jestaun, Governu ida agora plena-podér, problema mak nia laiha orsamentu maibé nia la’o ho duodésimu to’o orsamentu jerál aprova,”  nia esplika.

Vise-Xefe Bankada PLP ne’e afirma, enkuantu pedidu demisaun Primeiru-Ministru nian seidauk aprova hosi Prezidente Repúblika, meza Parlamentu mantein signifika situasaun la’o normál hela. Tanba, prezidente dehan primeiru-ministru sei iha plena-podér no meza Parlamentu laiha mudansa entaun situasaun la’o normál hela.

“Tanbasá mak sira indijita primeiru-ministru. Ne’e mak ami dehan tentativa golpe Estadu. Ne’e viola regra. Ida-ne’e públiku tenke hatene. Se lae, ita lori konfuzaun,” nia hateten.

Nia afirma, maski orsamentu 2020 xumba maibé Lei Jestaun Finanseira fó dalan ba orsamentu duodésimu hodi sustenta mákina Estadu.

“Signifika primeiru-ministru iha plena-podér no meza Parlamentu laiha mudansa. Ne’e katak Governu no Parlamentu la’o ho situasaun normál maibé koligasaun ida sira ba indijita primeiru-ministru ne’e ninia baze legál mak saida. Seráke, ida-ne’e atu fó solusaun ba impase, ema no partidu ne’ebé hanesan maka halo tiha impase maibé ba fali sorin halo koligasaun foun,” nia dehan.

Nia subliña, CNRT soe hela PLP ho KHUNTO no vota kontra orsamentu ba halo fali koligasaun foun tanba KHUNTO no PLP vota a-favór ba orsamentu.

“Prinsípiu ida iha plataforma AMP nian ne’e katak orsamentu tenke pasa. Sira viola tiha ida-ne’e depois ba fali harii koligasaun foun ho objeitvu atu fó solusaun ba impase, ne’e laiha lójika ida. Tanba ne’e mak ha’u dehan koligasaun ida agora ne’e la’o iha kalohan laran tanba partidu koligasaun Frente Dezenvolvimentu Demokrátiku ne’e mós sei iha problema,” nia informa.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here