Ministra Edukasaun Juventude no Desportu, Dulce de Jesus Soares. Imajen Tatoli/ Egas Cristóvão

DILI, 12 marsu 2020 (TATOLI)–Ministra Edukasaun Juventude no Desportu (MEJD), Dulce de Jesus Soares, hamutuk ho Embaixadór Nova Zelándia ba Timor-Leste, Philip Hewitt, kuarta (11/03/2020), lansa ona kampaña prevensaun coronavirus (COVIDA-19) ba Koordenadór Edukasaun Nível Pre-Eskolár.

Ministra Dulce de Jesus Soares, informa ekipa tékniku sira sei sensibiliza informasaun ba estudante sira kona-ba meiu prevensaun  ba COVID-19 iha Timor-Leste hahú iha semana oin.

“Ita mós sei prepara ekipamentu ijiene hanesan líkidu hodi hamoos rai, hamoos hariis fatin, aisar, balde no sabaun hodi fahe ba eskola Pre-Eskolár 380 iha Munisípiu 12 inklui RAEOA,” dehan Governante ba jornalista sira  iha Salaun INFORDEPE, Matadouro, kuarta (11/03/2020).

MEJD sei hamutuk ho Ministériu Saúde inklui Ajénsia Internasionál sira ne’ebé durante ne’e servisu iha área edukasaun sei halo sensibilizasaun informasaun ba estudante pre-eskolár sira, nune’e mós hodi distribui apoiu ne’ebé oferese ona hosi Embaixada Nova Zelándia.

“Kampaña ida-ne’e ita sei fó esplikasaun ba eskola sira oinsá mak profesór-sira atu ajuda estudante sira bele halo prevensaun ba COVID-19,” tenik Ministra Edukasaun.

Ohin, Ministériu Negósiu Estranjeiru hamutuk ho Embaixadór Nova Zelandia iha Timor-Leste hala’o enkontru, ita-nia ita-nia Ministru Negósiu Estranjeiru reprezenta Governu Timor-Leste hato’o agradesimentu ba Governu Nova Zelandia. Imajen: Nelia Fernandes

Iha biban hanesan, Embaixadór Nova Zelándia, Philip Hewitt, hateten sira-nia Governu prontu atu servisu hamutuk ho Ministériu Edukasaun hodi sensibiliza informasaun kona-ba ijiene sanitasaun ba  estudante nível pre-eskolár kona-ba meiu prevensaun coronavirus iha territóriu Timor-Leste.

“Kampaña ida-ne’e di’ak ba ema hotu tanba oras ne’e iha mundu tomak populasaun barak mak da’et ona coronavirus. Iha Nova Zelándia identifika populasaun na’in-lima afetadu ona, agora iha Timor-Leste presiza halo preparasaun ida di’akliu,” katak Embaixadór Nova Zelándia.

Jornalista : Tomé Amado 

Editór       : Agapito dos Santos

HAKEREK NO HATÁN

Please enter your comment!
Please enter your name here