Presidente Partidu Desemvolvementu Nasional,Fernando Gusmao.Imajen/Evaristo Martins

DILI, 11 marsu 2020 (TATOLI)—Prezidente Partidu Dezenvolvimentu Nasionál (PDN), Fernando Gusmão deklara,  koligasaun Frente Dezenvolvimentu Demokrátiku (FDD) sei eziste tanba partidu haat seidauk halo konferénsia hodi deside katak koligasaun ne’e la eziste ona.

Prezidente PDN, Fernando Gusmão afirma, ezisténsia Frente Dezenvolvimentu Demokrátiku bazeia ba regra no tuir lei eziste tanba FDD harii liuhosi konferénsia nasionál partidu haat (4) kompostu hosi Partidu Dezenvolvimentu Nasionál (PDN), União Demokrátika Timorrense (UDT), Frenti-Mudança (FM) no Partidu Unidade Nasionál Dezenvolvimentu Demokrátiku (PUDD).

Prezidente PDN kestiona, partidu tolu UDT, FM no PUDD hamutuk ho CNRT halo koligasaun ne’e maibé la konfirma ezisténsia FDD nian.

Fernando Gusmão informa, FDD estabelese iha 23 marsu 2018 no to’o agora sei eziste tanba seidauk iha konferénsia hosi partidu haat (4) ninian hodi hateten katak koligasaun ne’e la eziste ona.

“Komisaun Nasionál Eleisaun (CNE-sigla Portugés) mós sei konsidera FDD no daudaun ne’e ba aliansa foun ne’e maka partidu tolu (3) bá mesak ne’e, ami bele hateten katak ne’e ilegál tanba FDD ne’e esforsu no kontribuisaun PDN nian mós maka’as. Baze legál mak ne’e, transferénsia osan subvensaun públika ne’ebé mak Governu transfere ba partidu tolu ne’e reprezenta Frente Dezenvolvimentu Demokrátiku. Ba haree to’ok konta bankária BNCTL ne’e la’ós reprezenta partidu ida-idak más reprezenta Frente Dezenvovimentu Demokrátiku tanba ne’e mak CNE sei rekoñese katak koligasaun ida-ne’e seidauk lakon no depois atu hamate koligasaun mós tenke liuhosi konferénsia ida,” Prezidente PDN, Fernando Gusmão, informa ba Agência TATOLI iha edifísiu UNPAZ, kuarta ne’e.

Iha tempu kampaña, nia dehan, públiku hotu hatene katak Prezidente PDN ne’e mak reprezenta FDD hodi halo debate maibé to’o hetan rezultadu partidu tolu mesak de’it.

“PDN nia pozisaun sei nafatin iha Frente Dezenvolvimentu Demokrátiku, tanba ne’e mak partidu tolu ne’e labele hakarak mesak lori halo aliansa sein envolvimentu PDN nian iha ne’ebá,” nia kestiona.

Prezidente PDN ne’e afirma, partidu haat ne’e ninia votu mak reprezenta FDD. Se mesak, pergunta mak ne’e, partidu ida-idak fó votu hira, labele haree ba eleisaun rezultadu eleisaun 2017 tanba kada eleisaun ne’e votu bele sa’e no votu bele tun.

Prezidente PDN akresenta, iha 2017 partidu tolu nia votu bele barak uitoan maibé 2018 sei la’o mesak mós hotu-hotu sei la hakat liu barreira tanba tau hamutuk votu mak hodi hetan asentu parlamentár ne’e.

“Ha’u husu ita hala’o polítika iha ita-nia rain, se ita dehan atu konstrui ba rezolve impase polítiku iha ita-nia nasaun, labele halo polítika má-fé hodi esklui partidu balu ne’ebé fó ona kontribuisaun ne’ebé fó votu ba FDD para to’o ikus balun de’it mak aproveita no balun tau bá kotuk, ne’e ita sei la rezolve problema,” nia fó hanoin.

Hanesan Prezidente PDN seidauk asina akta ida kona-ba disolusaun hodi disolve FDD ne’e, tanba ne’e PDN sei parte iha FDD.

Hatán ba Deputadu UDT-FM, Francisco Carlos, fó-sai katak FDD ne’e disolve ona no iha momentu ne’e PDN bá ho inkondisionál, nia esplika, inkondisionál ne’e katak PDN sei la ba ejize A, B ka C, ne’e loos.

“Não me digas hetan tiha rezultadu ami ta’u tiha ba kotuk hotu ne’e, halo nusá mak ne’e. Ami-nian ida nein ba Parlamentu, nein ema ba Governu no nein ema-ida ba asesór. Ne’e polítika saida mak ne’e. Inkondisionál ne’e la signifika ami laiha direitu ba buat ida. Sira labele halo polítika má-fé. Nasaun ne’e sai aat ne’e tanba partidu sira-ne’e laiha boa-fé hodi nia ligasaun ba partidu sira seluk,” nia hateten.

Prezidente PDN ne’e mós laiha koñesimentu kona-ba UDT-FM dehan FDD ne’e disolve ona hosi Tribunál Rekursu.

“Se aprova disolusaun ne’e ho númeru hira, ne’e ha’u laiha koñesimentu, tanba ida-ne’e ha’u la hatene,” nia dehan.

Prezidente PDN ne’e mós laiha koñesimentu kona-ba Prezidente Repúblika husu kópia ba Tribunál Rekursu kona-ba ezisténsia FDD ne’e.

“Maibé ha’u haree iha mídia sosiál hatudu katak Gabinete Prezidénsia Repúblika haruka ona karta ba Tribunál Rekursu atu hodi deklara situasaun FDD nian no fó kópia koligasaun FDD nian ba Prezidente Repúblika, ne’ebé ita akompaña to’ok situasaun ne’e bá-oin oinsá,”  nia haktuir.

Prezidente PDN ne’e fó hanoin, solusaun mak ne’e, FDD ne’e partidu haat (4) ninian no FDD ne’e la’ós partidu tolu (3) nian de’it.

“Atu inkondisionál ka halo nusá mós ami-nia votu ba ne’e inkondisionál hotu ka. Ami-nia serbisu iha kampaña ne’e inkondisionál hotu ka. Ne’ebé sira-nia boá-fé no étika polítika ka lae atu rezolve problema,” nia subliña.

Nia hatutan, uluk halo ona prosesu ne’e ba tribunál maibé partidu tolu sente intupidu tanba ne’e sira hakrak di’akliu rezolve internál.

“Foin daudaun loron tolu liubá ha’u asina karta ida ba partidu tolu ne’e katak ami prontu dada fali keixa iha Ministériu Públiku no Tribunál maibe to’o agora laiha resposta katak sira la fó informasaun mai dehan bainhira mak enkontru ba problema sira-ne’e. Sira hadau-an loos atu ba Governu ne’e atu kaer ministru sira-ne’e, sira la liga ami ida. Ne’ebé, ha’u ta’uk sira-nia polítika má-fé ne’e mosu filafali depois sira tama ona Governu no sira la liga ona ami. Tanba ne’e ami sei kestiona beibeik,”  nia haklaken.

Nia esplika, se sira lori nafatin bandeira FDD entaun parte PDN sei kestiona. Se sira la halo tuir, PDN sei prosesa filafali ba Ministériu Públiku.

“Tanba ami prosesa kona-ba abuzu podér, liga ba má-administrasaun. Se iha tan faillansu ruma ami prosesa bá-oin tan, tanba ida-ne’e direitu partidu no militante nian,” nia esplika.

Notísia Relevante: Bankada UDT-FM Laiha Problema ho FDD

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here