Ministra Finansa Ein-Ezersísiu atuál Vise-Ministra Finansa, Sara Lobo Brites. Imajen Tatoli/Egas Cristovão

DILI, 11 marsu 2020 (TATOLI) – Iha reuniaun ezekutiva sira iha kuarta ne’e, aprova ona proposta ne’ebé aprezenta husi Ministra Finansa ein-ezersísiu, Sara Lobo Brites, kona-ba alterasaun datoluk ba Lei númeru 13/2019, 21 outubru nian kona-ba Orsamentu no Jestaun Finanseira.  

“Ohin ami aprova proposta ida hosi Ministériu Finansa (MF), ne’ebé hanesan alterasaun datoluk ba Lei Orsamentu no Jestaun Finanseira númeru 13/2019 artigu 31, ko’alia kona-ba rejime duodésimu”, dehan Sara Lobo ba Agência Tatoli iha Praça de Proclamação da Independéncia, Palásiu Governu, kuarta ne’e.

Tuir governante ne’e, alterasaun ne’e atubele iha fleksibilidade no fó biban ba Governu hodi bele atende situasaun balun hanesan kontratu ne’ebé Governu halo ho parseiru sira no ninia montante tenke selu kada fulan-ida.

“Nune’e bele atende situasaun ida agora hanesan saida maka ministériu sira infrenta hela, liuliu arendamentu ba embaixada sira tanba tuir kontratu ne’e tenke selu fulan-neen no balun tinan-ida, entaun ho rejime duodésimu la fó dalan atu ita selu fulan-neen dala-ida. Entaun, alterasaun ne’e atu prevee kondisaun hanesan ne’e, no mós situasaun balun ne’ebé ita hasoru hela hanesan ai-moruk, pagamentu ba benefísiu sosiál sira”, nia realsa.

Haree ba situasaun hirak-ne’e maka MF hola inisiativa atu halo alterasaun, nune’e loke dalan uitoan ba Governu hodi bele atende kontratu no mós nesesidade ne’ebé tenke halo tanba ultrapasa ona montante ne’ebé define.

Atuál Vise-Ministra Finansa ne’e salienta, rejime duodésimu hanesan dotasaun ba fulan-ida de’it no labele liu fulan-ida, nune’e mós ninia despeza mós ba fulan-ida.

Proposta alterasaun datoluk ne’e sei haruka ba Parlamentu Nasionál hodi diskute no hetan aprovasaun, no haruka filafali ba Prezidente Repúblika hodi promulga.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here