Xefe Bankada Partidu Demokrátiku (PD) no Atuál Portavóz Koligasaun Foun, António da Conceição ‘Kalohan'. Imajen /Egas Cristovão

DILI, 10 marsu 2020 (TATOLI)–Koligasaun foun ne’ebé forma husi partidu neen (6), lidera husi Kay Rala Xanana Gusmão, delega ona Sekretáriu Jerál Partidu Demokrátiku no Portavóz Koligasaun Foun, António da Conceição ‘Kalohan’, hodi submete tan karta audiénsia daruak ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin. 

“Responde ona ohin koligasaun ne’ebé maka lidera husi Prezidente Congresso Nacional de Reconstrução de Timor (CNRT), Kay Rala Xanana Gusmão, depoisde loron 6 fulan ne’e, mai hasoru-malu ho Prezidente Repúblika (PR), Francisco Guterres Lú Olo, hodi aprezenta koligasaun hafoin diálogu ne’ebé mak halo entre Prezidente Repúblika rasik ho Prezidente Koligasaun, ami fila no ami kompleta ona rekezitu ne’ebé maka Prezidente Repúblika husu liuliu ligadu ba konferénsia kada partidu polítiku ninian. Tanba hahú kedas iha loron 7 fulan ne’e, hotu-hotu realiza tiha ona konferénsia mak ohin ne’e mai submete fali karta pedidu audiénsia ba Prezidente Repúblika hodi konfirma tan dala ida koligasaun ninia disponibilidade, atu forma IX Governu Konstitusionál”, António hateten ba mídia hafoin entrega karta audiénsia.

Entretantu, partidu polítiku neen ne’ebé forma ona koligasaun foun kompostu husi CNRT, PD, KHUNTO, PUDD, UDT no FM, idak-idak realiza ona ninia kongresu estraordináriu hodi responde ba pedidu Prezidente Repúblika (PR), Francisco Guterres Lú Olo, iha loron 6 fulan ne’e, hafoin audiénsia ho líder másimu husi partidu neen.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here