Xefe Bankada Partidu Demokrátiku (PD) no Atuál Portavóz Koligasaun Foun, António da Conceição ‘Kalohan'. Imajen Tatoli/Egas Cristovão

DILI, 10 marsu 2020 (TATOLI)–Koligasaun foun ne’ebé kompostu husi partidu neen, indijita ona Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, ba Primeiru-Ministru (PM) IX Governu Konstitusionál. 

Sekretáriu Jerál Partidu Demokrátiku no Portavóz Koligasaun foun, António da Conceição fórmula sai asuntu ne’e, hafoin entrega karta audiénsia daruak ba Prezidente Republika, iha Palásiu Prezidente Nicolau Lobato, Bairru Pité, Dili.

“Karta ne’e mós espesífikamente temi ona katak koligasaun foun indijita Kay Rala Xanana Gusmão nu’udár Primeiru-Ministru ba Governu Dasiak kuandu Prezidente Repúblika simu”, António hateten.

Kona-ba realizasaun audiénsia ne’e, António dehan, depende ba Prezidente Repúblika mak sei deside.

Koligasaun foun ne’e mós sei la halo tan kongresu hamutuk, tanba António konsidera laiha nesesidade.

“Laiha nesesidade atu halo kongresu hamutuk, tanba ne’e la’ós ba aprezenta filafali lista deputadu. Ida-ne’e atu iha de’it nesesidade akordu entendimentu polítiku hodi halo formasaun Governu”, António subliña.

Entretantu, partidu polítiku neen ne’ebé forma ona koligasaun foun kompostu husi CNRT, PD, KHUNTO, PUDD, UDT no FM, idaik-dak realiza ona ninia Kongresu estraordináriu hodi responde ba Pedidu Prezidente Repúblika (PR), Francisco Guterres Lú Olo, iha loron 6 fulan ne’e, hafoin audiénsia ho líder másimu husi partidu neen.

Jornalista: Cipriano Colo

Editór: Cancio Ximenes

HAKEREK NO HATÁN

Please enter your comment!
Please enter your name here