DILI, 09 marsu 2020 (TATOLI)–Ohin, International Organization for Migration (IOM-sigla ingles) inisiativa oferese formasaun ba formadór sira husi Munisípiu 12 inklui Rejiaun Administrativu Espesial Oe-Cusse Ambeno (RAEOA) kona-ba Violénsia Bazeia ba Jéneru no Protesaun iha emerjénsia nian.

Tuir Xefe Misaun IOM iha Timor Leste, Wonesai Workingtong Sithole hateten, bainhira hamenus kazu hanesan Violénsia Bazeia ba Jéneru (VBJ) ne’e presiza ema hotu-hotu nia partisipasaun tanba mane sira presiza tau matan ba inan-feton sira no reforsa inan-feton sira bainhira sira presiza.

“Ita hakarak hamenus Violénsia Bazeia ba Jéneru, presiza partisipasaun husi ema hotu nomós mane sira tenke tau matan ba inan-feton sira,” nia Xefe Misaun IOM iha Timor Leste, Wonesai Workingtong Sithole, ba jornalista sira hafoin halo abertura ba formasaun VBJ iha salaun Ana Lemos, UN Coumpound, Caicoli, Dili, segunda (9/3/2020).

Entretantu, Diretora Nasionál Abordajen Integradu Jéneru Kapasitasaun Feto iha Sekretária Estadu Igualdade no Inkluzaun (DNAIJKF-SEII), Maria Filomena Babo Martins hateten, formasaun ba formadór sira ne’e realiza tanba inisiativa hosi IOM hamutuk ho Governu hodi kapasita di’ak liután kona-ba violénsia bazeia ba jéneru (VBJ) ba formandu sira husi asosiasaun feto no pontu vokál husi Munisípiu 12 inklui Rejiaun Administrativu Espesial Oe-Cusse Ambeno (RAEOA).

“IOM serbisu hamutuk ho Governu iha inisiativa rasik hodi oferese formasaun kona-ba violénsia bazeia ba jéneru ba ita-nia asosiasaun feto no pontu vokál sira iha Munisípiu 12 inklui RAEOA,” nia dehan.

Diretora ne’e hatutan, fromasaun ne’e ho objetivu oinsá mak bele identifika partisipante sira iha Teinu ba Treinadór (ToT-sigla ingles) sira kona ba VBJ iha tempu emerjénsia nian.

“Formasaun ne’e ho objetivu oinsá mak ita atu identifika ita-nia partisipante iha treinu ba treinadór kona-ba violénsia bazeia jéneru iha emerjénsia nian. Entaun Governu ho nia parseiru sira uza polítika no estratéjia hodi oinsá hakotu violénsia ne’e mak presiza liuhosi ita-nia sosializasaun, formasaun nomós liuhosi kampaña 16 dias tinan-tinan. Maibé kona-ba emerjénsia nian, ita mós hala’o ona maibé ema barak mak seidauk hatene kona-ba ida ne’e,” nia haklaken.

Ezemplu, nia haktuir, iha 2006 momentu krize akontese mane barak mak dook husi feen ho oan sira no dala barak laiha responsabilidade ba feen ho oan iha momentu ne’ebé sira presiza tebes, entaun hirak ne’e hanesan tipu Violénsia Bazeia ba Jéneru (VBJ).

Nune’e ho hanoin hirak ne’e, IOM nia inisiativa di’ak tebes hodi fó formasaun ida ne’e hodi bele fasilita no loke ema nia laran ba situasaun emerjénsia nian iha momentu akontese.

Formasaun ne’e, hala’o durante loron tolu ne’ebé hahú iha segunda (09/3/2020) no sei ramata iha kuarta (11/3/2020) aban.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here