Komunidade Tibar halo protesta ba fatin Izolamentu coronavirus ne'ebé governu deside iha Tibar. Imajen/Domingos Piedade

DILI, 09 marsu 2020–Autoridade Lokál no Komunidade Suku Tibar, Postu Administrativu Bazartete, Munisípiu Liquiça rezeita ho planu hosi Ministériu Saúde hodi estabelese fatin izolamentu ba pasiente Coronavirus tanba sira konsidera fásil atu da’et ba komunidade.

Horacio da Concencao.Imajen/ Domingos

Sira hato’o protesta ne’e relasiona ho planu MS sei koloka sidadaun Itália ida ne’ebé dadaun ne’e suspeitu ba coronavirus ka COVID-19 no sei koloka ba fatin izolamentu areadór Tibar.

Sidadaun estranjeiru hosi nasaun Itália ne’e, oras ne’e halo hela tratamentu iha fatin izolamentu STAMFORD MEDICAL LDA Mandarin Dili.

Reprezentante Komunidade Suku Tibar, Horacio da Conceição, hateten sira la aseita ho polítika MS atu koloka pasiente coronavirus hodi hela besik komunidade.

“Ha’u hanoin ami komunidade rejeita totál tanba kuandu pasiente coronavirus diretamente sei afeita ba ami komunidade Tibar,”afirma nia ba Ajênsia TATOLI, iha Sede Suku Tibar, ohin.

Nia sujere ba Ministériu Saúde atu retira polítika ne’e tanba komunidade sei la fó apoiu ba desizaun refere.

“Ami sujere ba governu atu tau iha Jaco ou fatin seluk hanesan roo ida iha tasi klaran ne’ebá,”tenik tan.

Komunidade sei halo asaun greve hasoru Governu bainhira la konsidera sira-nia opiniaun hodi kontinua estabelese fatin izolamentu ba pasiente coronavirus iha fatin ne’ebá.

Xefi suku Tibar Bento Coreia.Imajen/ Domingos Piedade

Xefe Suku Tibar, Postu Administrativu Bazartete, Munisípiu Liquiça, Bento Correia da Conceiçăo, informa komunidade maka sei foti desizaun aseita ka la aseita ho polítika implementasaun polítika Ministériu Saúde.

Entretantu, Oras nee komunidade Suku Tibar hala’o hela enkontru ho pesoál Saúde husi Ministériu Saúde, Servisu Saúde Munisípiu Liquiça hodi esplika kona-ba coronavirus.

Jornalista : Domingos Piedade Freitas
Editór      : Agapito dos Santos

HAKEREK NO HATÁN

Please enter your comment!
Please enter your name here