Prezidente Institutu Petróleu no Jeolojia, Hélio Casimiro Guterres. Imajen Tatoli/António Gonçalves

DILI, 09 marsu 2020 (TATOLI) – Prezidente Institutu Petróleu no Jeolojia (IPG, sigla portugés), Hélio Casimiro Guterres, rekoñese durante ne’e institutu seidauk iha laboratóriu atu halo teste amostra sira ne’ebé identifika ona iha peskiza no investigasaun ba mina no gás.

“Ita iha limitasaun, maibé la halakon ita-nia vontade atu servisu. Ita kontinua servisu nafatin, maski laiha laboratóriu tanba ita seidauk iha terenu atu halo instalasaun”, tenik Prezidente IPG ne’e iha ninia knaar fatin, Rotunda Elemloi, segunda ne’e.

Dirijente ne’e realsa, la’ós IPG maka lakohi atu halo laboratóriu, maibé dezde 2012 hahú buka ona terenu ka rai atu halo instalasaun mákina laborátoriu nian, maibé seidauk konsege tanba laboratóriu presiza fatin permanente no seguru atu halo instalasaun.

“Ita lakohi instala iha fatin provizóriu hafoin ema haruka ita muda fali ba fatin seluk, ne’ebé ami lakohi,” nia akresenta.

Ho limitasaun ne’e, tuir Prezidente IPG, durante ne’e amostra petróleu no minerál tenke lori ba rai-li’ur atu halo análize ka teste.

“Ami-nia amostra sira durante ne’e lori ba laboratóriu Kanadá tanba ita fiar, no balun ita haruka ba Austrália, Singapura, Japaun no Korea”, nia informa.

Hélio Casimiro adianta, dezde 2012 to’o 2019 konsege hetan ona suporta husi Ministériu Justisa ne’ebé indika ona rai iha eis edifísiu Aspol iha Ministériu Solidarisade Sosiál no Inkluzaun ninia kotuk, iha área Caicoli, atu konstrui edifísiu ne’ebé kompleta ho laboratóriu iha ne’ebá no rai ida tan iha APORTIL, área Tasi-Tolu.

“Ita presiza harii laboratóriu tanba ita-nia ema mós preparadu atu servisu iha laboratóriu no hatene ona servisu saida mak tenke halo iha laboratóriu”, nia dehan tan.

Diretór  Investigasaun Jeolojia IPG, Elias da Silva Cabral, rekoñese durante ne’e institutu hetan difikuldade seidauk iha laboratóriu atu halo teste ba fatuk minerál.

Nia haktuir, durante ne’e bainhira presiza atu halo análize ba amostra ruma, tenke hamutuk ho laboratóriu Universidade Nacional Timor Lorosa’e (UNTL) iha Hera, maski limitadu maibé aproveita hodi bele halo análize ba amostra ne’ebé iha.

“Laboratóriu UNTL iha Hera mós limitadu tebes tanba bele halo análize petografia, palentolojia, no minerál gráfika de’it”, nia informa.

Nia refere kona-ba kustu orsamentu, depende ba métodu sampel hira maka haruka ba halo análize iha laboratóriu.

“Kuaze kustu la hanesan tanba pin injection test per sampel, selu to’o $50 mak foin bele halo análize, ne’ebé seidauk konta shipping cost. Iha tinan-2014, ami halo análize sampel hamutuk 40 ba stream sediment ho kustu hamutuk $9.000-resin ba análize ida de’it”, nia esplika.

Dirijente ne’e hatutan: “Imajina ita halo estudu barak, osan sira-ne’e ita rai hamutuk dalaruma ita mós bele hola ona ekipamentu ida. Tanba sá maka ita la halo de’it ita-nian”, nia akresenta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here