Ministra Finansa ein ezersísiu, Sara Lobo Brites Hasai Foto Hamutuk Formasaun Nasional Kontabilidade no Relatorio Finanseiru Setor Publiku. Imajen/Egas Cristovao

DILI, 09 marsu 2020 (TATOLI) – Diresaun Jerál Tezouru (DJT), Ministériu Finansa (MF) fó formasaun ba tékniku Entidade Autónoma sira, hodi prepara relatóriu finanseira anuál tuir padraun internasionál kontabilidade no submete ba Kámara Konta.

Formasaun ne’e, nu’udar formasaun ba faze daruak ninian, ne’ebé faze dahuluk hala’o tiha ona iha tinan-2019 no kobre ba Ajénsia Públika Autónoma (APA) hamutuk 34, inklui munisípiu sira.

Iha formasaun dahuluk ne’e, ninia matéria báziku maka hanesan rekonsiliasaun bankária, relatóriu fluxu kaixa no relatóriu ezekusaun trimestrál, ne’ebé hanesan síklu atu prepara relatóriu finanseira anuál.

Ministra Finansa ein ezersísiu, Sara Lobo Brites, husu ba formandu sira atu konsentra ba matéria ne’ebé sei fó durante formasaun, nune’e mós husu ba direjente APA sira atu mantein ninia téknika sira hodi partisipa formasaun ne’e to’o ramata, hodi bele prepara relatóriu finanseira anuál ne’ebé di’ak no kualidade.

“Formasaun ne’e ba daruak ona, tanba iha 2019 hala’o tiha ona hosi Diresaun Jéral Tezouru hahú ba téknika sira hotu hosi Ajénsia Públika Autónoma no mós munisípiu sira. Tanba ne’e sesaun agora hanesan kontinuasaun husi formasaun ho objetivu atu fó kbiit, koñesementu ba entidade autónoma ninia téknika hotu iha área finansa, iha ámbitu preparasaun prestasaun konta ba iha Parlamentu Nasionál (PN)”, dehan Sara Lobo iha abertura formasaun ne’ebé hala’o iha Salaun Ministériu Finansa (MF), Aitarak-Laran, segunda ne’e.

Ministra Finansa ein ezersísiu, Sara Lobo Brites . Imajen/Egas Cristovao

Tuir atuál Vise-Ministra Finansa ne’e, prestasaun konta ne’e nu’udar parte importante ida hosi síklu orsamentu, ne’ebé durante ne’e iha prátika desde Ajénsia Públika Autonónoma sira goza sira ninia atonomia finanseira, barak liu foku de’it ba iha preparasaun orsamentu no ezekusaun, maibé iha prestasaun konta diresaun tezouru maka prepara no aprezenta ba iha Tribunál Konta.

“Entaun ida-ne’e sai ezijénsia ne’ebé mak tuir lei hahú kedas hosi Konstituisaun Repúblika, Tribunál Superiór Administrativu ka Fiskál Konta nian maka órgaun supremu ne’ebé maka responsavél ba fiskalizasaun no legalidade ba despeza públika no mós halo julgamentu iha konta Estadu”, nia realsa.

Governante ne’e subliña, kada tinan DJT aprezenta konta ne’ebé maka agregadu, katak konsolida entidade hotu ninia despeza no aprezenta relatóriu ne’ebé jéral, maibé husi instituisaun públika autonónoma sira to’o agora balun seidauk aprezenta rasik relatóriu.

Tanba ne’e, tuir Ministra Finansa ein ezersísiu katak, prestasaun konta importante tebes hosi síklu orsamentu no bainhira ko’alia kona-ba síklu orsamentu iha pontu haat ne’ebé importante, hahú hosi mobilizasaun rekursu ne’ebé ko’alia liu kona-ba makro framework ka ko’alia kona-ba fonte reseita, fonte finansiamentu iha orsamentu ne’ebé ko’alia kona-ba formulasaun orsamentu ne’e rasik no aprovasaun hosi PN no hetan promulgasaun hosi Prezidente Repúblika, jestaun tezouru no mós patrimóniu, no ikus liu mak Kontabilidade, Reporting no Auditoria.

“Durante ne’e, ita ezerse liu APA sira ninia knaar to’o de’it ezekusaun, maibé prestasaun konta seidauk halo. Ida ne’e rekezitu ne’ebé mak iha lei la’ós de’it iha Konstrituisaun Repúblika maibé mós iha Lei Jestaun Finanseira iha artigu 45. Prestasaun kontra rekezitu lei ne’e mós hatudu promove boa-governasaun no mós promove transparénsia, liuliu iha transparénsia fiskál iha setór públiku, no mós promove trasparénsia ba setór sira seluk hanesan setór finanseiru, setór privadu, no sosiedade sivíl. Tanba sidadaun hotu atu hetan informasaun ne’ebé maka nesesáriu hanesan mós responsabilidade ba Governu bainhira utiliza rekursu públiku”, nia salienta.

Nune’e, Sara argumenta, objetivu husi formasaun ne’e la’ós de’it atu forma no simu sertifikadu, maibé iha ámbitu formasaun halo kedas prátika tanba ekipa idaidak sei halo simulasaun relatóriu no sei aprezenta filafali ba idaidak ninia xefe, atu prova katak durante formasaun iha duni kbiit atu prepara relatóriu finanseiru.

Sorin seluk, Diretór Nasionál Kontabilidade no Normalizasaun Kontabilístika iha Diresaun Nasionál Tezouru, Ministériu Finansa, Ernesto da Conceição Silva, hateten formasaun ne’e hanesan formasaun ba faze daruak, ne’ebé konsentra ba matéria atu prepara relatóriu finanseira anuál, tuir Lei Jestaun Finansa Públika no mós ajénsia sira ne’ebé maka hetan ona autónoma finanseira.

“Sira hetan rasik orsamentu, sira halo rasik ezekusaun no sira tenke presta konta jéral ne’ebé durante sira halo ezekusaun, no tenke submete ba Kámara Konta kada loron 31 maiu. Ezemplu 31 maiu 2020, sira tenke aprezenta ezekusaun 2019 nian, maibé molok 31 maiu tenke submete uluk ba tezouru iha fulan-abríl hodi nune’e tezouru halo revizaun atu konsolida relatóriu sai konta jéral Estadu ba Estadu tomak nian”, nia akresenta.

Entretantu ajénsia autónoma na’in-20, kompostu hosi ajénsia sira ne’ebé ho reseita própriu hamutuk 12 no ajénsia ualu la’ós ho reseita própriu, maibé haree ba alokasaun orsamentu ba sira liu millaun $1.

Formasaun ne’e fahe ba semana rua, ne’ebé semana dahuluk hahú ohin no finaliza iha sesta semana ne’e, no formasaun ba grupu seluk sei hahú iha segunda semana oin.

Jornalista: Anónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here