DILI, 08 marsu (TATOLI)–Partidu Frenti-Mudança (FM), ohin,  hala’o konferénsia estraordinária hodi reafirma ba konferénsia anteriór nian nune’e Frenti-Mudança halo koligasaun ho partidu CNRT no partidu sira seluk hodi forma IX Governu Konstitusionál.

Membru Komisaun Jurídika Partidu FM, Daniel Pereira hateten, rezultadu konferénsia hatudu katak delegadu husi munisípiu 12 inklui RAEOA reafirma prontu atu envolve iha koligasaun foun hodi forma IX Governu ne’ebé sei lidera hosi Partidu Congresso Nacional de Reconstrução de Timor (CNRT) ne’ebé lidera husi Kay Rala Xanana Gusmão.

“Konferénsia ne’e atu reafirma pozisaun partidu Frenti-Mudança nian prontu humutuk ho koligasaun ne’ebé  lidera hosi Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, Partidu Demokrátiku (PD), Partidu KHUNTO, Partidu Uniaun Demokrátika Timorense (UDT) no Partidu Unidade Dezenvolvimentu Demokrátiku (PUDD), hodi forma IX Governu,” dehan membru Komisaun Jurídika FM, Daniel Pereira, ba jornalista sira iha Otél Arbiru, Dili, ohin.

Tuir nia, reafirmasaun Partidu Frenti-Mudança ne’e bazeia ba enkontru ho líder nasionál iha loron 10 fevereiru 2020 iha Palásiu Presidente Nicolau Lobato ne’ebé prezide hosi Prezidente Repúblika no deklara ofisialmente katak eleisaun antesipada nu’udar rekursu ikus no partidu polítiku ne’ebé iha asentu Parlamentu buka dalan hodi hetan solusaun ba impase polítika.

“Tanba ne’e, bazeia ba enkontru ne’e mak Partidu FM reafirma pozisaun atu fó apoiu totál unanimidade ba deklarasaun konjunta hodi forma IX Governu,” nia dehan.

Konferénsia ida-ne’e partisipa hosi reprezentante husi munisípiu 12 inklui Rejiaun Administrativu Espesiál Oé-Cusse Ambeno (RAEOA).

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here