Aviaun ZEESM. Imajen/twinotterarchive

DILI, 07 marsu 2020 (TATOLI) – Autoridade Rejiaun Administrativa Espesiál Oé-Cusse Ambeno no Zona Espesiál Ekonomia Sosiál Merkadu (RAEOA-ZEESM) deside hatún folin billete Aviaun ZEESM ba $25, hafoin hetan manutensaun iha 1 fevereiru 2020, hodi halo subtituisaun pesa repozisaun.

Tuir nota ne’ebé Agência Tatoli asesu, aviaun ne’e sei semo hikas iha loron 9 marsu 2020 ho folin asesível ba nível sosiedade no entidade hotu, nune’e bele suporta movimentu sidadaun sira atu ba Oé-Cusse no Suai.

“Folin billete ba Aviaun ZEESM, antes ne’e husi Oé-Cusse ba Dili ho folin $65 to’o $75 no Dili ba Suai ho folin $41 to’o $51, maibé daudaun ne’e redús ona ba $25, nune’e bele loke oportunidade ba ema-hotu atu investe no hasa’e vizita turizta sira-nia  iha Oé-Cusse no Suai”, refere nota husi Autoridade ZEESM.

Redusaun ba folin ne’e nu’udar polítika ida hodi motiva elementu sosiedade hotu, inklui emprezáriu sira ne’ebé hakarak investe iha Oé-Cusse no Suai, nune’e mós atu hasa’e vizita turizta iha zona espesiál ne’e, nu’udar kompromisu polítika hosi Prezidente RAEOA-ZEEMS, José Luís Guterres ‘Lugu’ kona-ba promosaun riku-soin naturál potensível ne’ebé sai prioridade baOé-Cusse.

Antes ne’e, ekipa téknika husi Gabinete Prezidente Autoridade RAEOA-ZEESM Timor-Leste, hala’o ona konsultasaun ho ATCO Group kona-ba lisensiamentu hodi permite Autoridade Aviasaun Sivíl Timor-Leste (AACTL,sigla portugés) bele regula no kontrola tráfegu aériu iha Timor-Leste, inklui mós redusaun presu billete husi Aviaun ZEESM ho tipu Twin Otter 400, ne’ebé sei akomoda ho totál pasajeiru hamutuk na’in-19 ba kada voo.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here