Kareta Estadu balun ne'ebé aknum funsionariu sira sobu tiha ona nia kadeira sira iha laran. Imajén/Eugénio Pereira

DILI, 06 marsu 2020 (TATOLI)- Liu husi operasaun konjunta, kompostu hosi Polisia Nasionál Timor-Leste (PNTL), Diresaun Nasionál Transporte no Terrestre (DNTT), Diresaun Nasionál Patrimóniu Estadu (DNPE) no Komisaun Anti Korrupsaun (CAC), ohin, hala’o apreensaun ba karreta doasaun hosi doadór hamutuk sia (9) ne’ebé pertensia ba Ministériu Edukasaun nian.

Ekipa Polisia Nasionál Timor-Leste (PNTL), Diresaun Nasionál Transporte Terrestre (DNTT), Patrimóniu Estadu (DNPE) no Komisaun Anti Korrupsaun (CAC) hala’o apreensaun ba karreta estadu sia (9) iha Ministériu Edukasaun Vila-Verde Dili ne’ebé ninia mákina no kadeira tuur fatin ema sobu hotu ona. Imajen/Eugénio Pereira

Karreta sia ne’e ekipa halo apreensaun bazeia ba dekretu lei númeru 8/2004 katak, patrimóniu estadu hotu tenke rejistu nu’udar patrimóniu estadu Timor-Leste.

Karreta hirak ne’e Diresaun Nasionál Patrimóniu Estadu rasik fó ona karta ba Ministériu Edukasaun hodi husu atu rejista transporte hirak ne’e ba Patrimóniu Estadu nian, maibé too agora parte Ministériu Edukasaun la koopera atu ba rejista.

Tuir observasaun Ajénsia Tatoli iha operasaun ne’e hatudu, karreta balun autór funsionáriu sira  sobu ona mákina (mesin) inklui karreta nia kadeira tuur fatin no pesa importante seluk tan lakon hotu ona.

Pontu vokál ekipa konjunta husi Patrimóniu Estadu, Cipriano do Rosario Pereira, esplika, karreta hirak ne’e tuir loloos tenke rejista nu’udar patrimóniu estadu nian, maibé durante tinan barak oknum funsionáriu balun utiliza hodi muda xapa matrikula ba karreta privadu.

“Karreta sira ne’e doasaun hosi Banku Mundiál nian, maibé sira lakohi rejistu ba Patrimóniu Estadu tinan barak ona, tanba ne’e ohin ita mai foti para halo prosesu,” esplika Cipriano ba jornalista iha edifísiu Ministériu Edukasaun, Vila-Verde, Dili.

Operasaun hanesan sei hala’o mós ba liña Ministériu sira hanesan, Ministériu Obras Públika (MOP), Ministériu Saúde, Ministériu Agrikultura no Peska no ministériu seluk tan inklui instituisaun estadu ne’ebé lori karreta estadu ba para iha uma sei foti hotu.

“Operasaun hanesan sei foti mós karreta balun iha liña ministériu 10 liu ne’ebé ami identifika ona seidauk halo rejistu iha Patrimóniu Estadu,” nia hatete.

Iha fatin hanesan, Narcio F. Marçal nu’udar Funsionáriu Ministériu Edukasaun ne’ebé utiliza karreta Marka Nissan Kijang Terranu xapa matrikula 10752 rekoñese karreta ne’e nia uza hodi halo servisu Ministériu Edukasaun nian.

Narcio konta, karreta la ba rejista iha Patrimóniu Estadu, tanba doasaun husi Banku Mundiál maka fó ba sira uza hahú tinan 2008 too 2015. Nune’e, iha tinan 2015 bainhira Banku Mundiál remata mandatu hodi muda fali funsionáriu hirak ne’e ba servisu iha Ministériu Edukasaun nu’udar funsionáriu kontratadu hodi utiliza nafatin transporte hirak ne’e too agora.

Nia hatutan, durante uza karreta ne’e rasik halo manutensaun gasta osan hamutuk  $6.000.00 liu.

Iha fatin hanesan, Diretór Lojístika Patrimóniu Ministériu Edukasaun Marito Soares, rekoñese karreta sia (9) uluk Banku Mundiál maka fó ba Ministériu Edukasaun, hahú husi tinan 2015 too agora karreta barak aat no balun sei di’ak hela.

Nia dehan, parte Ministériu Edukasaun koopera ho ekipa konjunta hodi lori karreta sira ne’e ba rejista para haree ninia prosesu atu loke leilaun ou lae, ne’e depende ba Patrimóniu Estadu.

Tuir nia katak, karreta sira ne’e la rejistu ba Patrimóniu Estadu, tanba iha altura Banku Mundiál remata nia mandatu entrega karreta sira ne’e la iha termu entrega legál.

“Difikuldade ne’ebé ami hasoru maka karreta sira ne’e Banku Mundiál entrega la iha termu entrega, tanba ne’e la ba rejista too agora,” nia esplika.

Daudaun ne’e Ministériu Edukasaun iha karreta estadu hamutuk 120-maka rejista, no karreta 10-resin maka la rejista tanba oferese hosi doadór.

Iha fatin hanesan, pontu vokál Komisaun Anti Korrupsaun (CAC), Euclides Madeira dehan, CAC akompaña prosesu operasaun konjunta ne’e karik mosu irregularidade no krime balun sira nia parte sei halo relatóriu hodi prosesa tuir lei.

Nia dehan, operasaun ne’e halo hodi asegura sasán patrimóniu estadu nian tomak ne’ebé funsionáriu no kargu xefia diresaun too ministru sira uza tenke rejista legál iha patrimóniu estadu tuir lei hatete.

“See maka lakohi koopera atu rejista kualkér apoiu hosi doadór ba patrimóniu estadu sei prosesa tuir lei karik mosu krime ruma,” nia hatete.

Kona-ba preokupasaun ne’e, parte CAC no PNTL inklui Patrimóniu Estadu sei halo relatóriu hodi hosi responsabilidade ba ema sira ne’ebé utiliza karreta hodi hatán prosesu iha Ministériu Públiku.

Karreta sira ne’ebé halo apreensaun, ekipa tula kedas hodi ba asegura iha edifísiu Patrimóniu Estadu, Balidi, Dili, hodi prosesa ninia dokumentu.

Inspesaun surpreza no asaun represivu ne’e hala’o bazeia ba informasaun sekreta ne’ebé ekipa intelijénsia operasaun konjunta fornese ba Patrimóniu Estadu Sentrál iha Ministériu Finansa nia mahan.

Jornalista : Eugénio Pereira

Editór       : Francisco Simões

2 KOMENTÁRIU

  1. Termu de entrege imi labele halo ga, imi halo tia se mak atu hodi karata sir nee pasiar ba mai tula familia sira. Lalika xapa privadu, xapa governu nian deit, dader meudia no lorokraik ita hare hela tula oan sira ba eskola. Ida nee tenki muda…

  2. nudar sidadun ida hau kongratula ba imi nia ekipa hotu, parabens, parabens, servisu neneik no bebeik sei hatudu fantastiku iha futuru. espresa katak sei halo ba ministerio hotu no ba patrimoniu estadu hotu hosi kiik to boot/husi motor to kareta. funsionario ou xefia sira nebe utiliza kareta estadu tenke rejistu tantu hasai osan husi governu ou husi DOADOR, tamba saida mak husi DOADOR tenke rejista tamba DOADOR mai suporta timor oan hotu liu husi ministerial, LAOS MAI SUPORTA liu husi ITA BOT SIRA NIA NARAN PESSOAL OU ITA BOT SIRA NIA KARGU. so DOADOR mai tamba NASAUN TIMOR LESTE laos mai tamba ita bot sira nian privado. I sure that you all are understanding…abraco

HAKEREK NO HATÁN

Please enter your comment!
Please enter your name here