Xefe GPM, Afonso Henriques Ferreira Cortereal. Imajen Tatoli/António Gonçalves

DILI, 05 fevereiru 2020 (TATOLI) – Xefe Gabinete Primeiru-Ministru (GPM), Afonso Henriques Ferreira Cortereal, konsidera atu prevene moras Coronavirus iha Timor-Leste, papél mídia importante tebes ba divulgasaun informasaun sira.

Liga ho kestaun ne’e, Ministru Reforma Lejizlativa no Asuntu Parlamentár, Fidelis Manuel Leite Magalhães bolu Sekretáriu Estadu Komunikasaun Sosiál, Merício Juvinal dos Reis ‘Akara’, hamutuk ho responsável sira husi Gabinete Primeiru-Ministru (GPM), Rádiu Televizasaun Timor-Leste, Empreza Públika (RTTL,EP), Agência TATOLI, no Asosiasaun Jornalista sira, atu atualiza informasaun kona-ba  papél mídia liga ho asuntu Coronavirus.

“Ita hatene katak Coronavirus rasik nu’udar ameasa ida ba mundu, liga ba situasaun Timor-Leste ne’ebé ladún preparadu ohin Ministru Fidelis bolu ami mai atu atualiza ba malu kona-ba Coronavirus rasik ho ninia mekanizmu prevensaun ida maka husi mídia, liuhosi prevene labele fó informasaun ne’ebé maka ladún di’ak ligadu ho virus ne’e, nune’e labele halo tauk populasaun sira”, informa Afonso hafoin ramata enkontru iha Gabinete Ministériu Reforma Lejizlativa no Asuntu Parlamentár (MRLAP) iha Palásiu Governu, kinta ne’e.

Nia dehan, haree ba kondisaun ne’ebé maka Timor-Leste ladún prepadu ho di’ak hodi hasoru Coronavirus, husi aspeitu ai-moruk la sufusiente, inklui hospitál no klínika sira ne’ebé ladauk preparadu, maka mídia tenke kontribui pasa informasaun ba komunidade ho di’ak.

“Tanba ne’e, husu ba mídia sira tenke kontribui informasaun ne’ebé di’ak ba públiku liuliu liga ba maneira prevensaun sira hodi publika iha rádiu, televizaun, jornál no mídia elektrónika, nune’e públiku bele informadu no ita-nia populasaun sira bele komprende di’ak liután”, nia realsa.

Maski Timor-Leste sei livre husi Coronavirus, maibé tuir Afonso tenke antesipa no halo prevensaun ba virus ne’e rasik, tanba ne’e Governu kontinua esforsu nafatin atu kombate ho forma oinoin.

“Ita bo’ot sira haree foin daudaun Konsellu Ministru aprova mós kona-ba prevensaun Coronavirus no ida ne’e kompeténsia Ministériu Saúde no agora ministériu ne’e rasik halo ona esforsu ba kestaun ne’e, hodi enkontru ho parseiru internasionál sira no Organizasaun Saúde Mundiál (OMS) hodi haree kona-ba kestaun ne’e”, nia akresenta.

Afonso realsa, iha modelu prevensaun sira ne’ebé OMS iha Timor-Leste fó sai ona katak tenke fase liman ho sabaun bainhira kaer liman ho ema, bainhira mear tenke taka ibun uza máskara no seluk seluk tan.

Tanba ne’e, nia husu ba populasaun to’o área rurál sira tenke akompaña nafatin informasaun kona-ba Coronavirus.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here