Sekretáriu Estadu Komunikasaun Sosiál, Merício Juvinal dos Reis ‘Akara’ halo abertura iha formasaun ne’ebé realiza husi CEFTEC. Imajen Tatoli/Natalino Costa

DILI, 04 marsu 2020 (TATOLI)Sentru Formasaun Tékniku iha Komunikasaun (CEFTEC-sigla portugés) realiza formasaun Kualifikasaun Nasionál iha Komunikasaun no Multimedia ba períodu 2020, ne’ebé loke husi Sekretáriu Estadu Komunikasaun Sosiál, Merício Juvinal dos Reis ‘Akara’.

Iha diskursu seremónia abertura formasaun, Sekretáriu Estadu Akara motiva formadu sira atu partisipa ho másimu ba oportunidade ne’ebé maka iha, atubele hetan benifísiu bainhira konklui formasaun.

“Ha’u husu ba ita bo’ot sira atu hatudu seriedade hodi aproveita tempu tuir formasaun ne’ebé maka iha, nune’e bele eleva imi ninia koñesimentu”, tenik Akara iha sala Auditoria Muzeu Rezisténsia, kuarta ne’e.

Governante ne’e konsidera, formasaun CEFTEC ne’e importante tebes ba joven sira hodi bele kontribui ba nasaun.

“Ita hatene katak daudaun ne’e ita iha ona era dijitalizasaun, tanba ne’e formadu sira presiza hatudu seriedade, nune’e iha era ne’e bele kompete liuhosi multimedia no bele kria saida maka ita hatene hodi ita nia nasaun bele adopta tuir dijitalizasaun”, nia dehan.

Nune’e, nia dezafia CEFTEC, atu ba oin bele evolui di’ak liután liuhosi fó formasaun ba joven sira iha área oinoin.

“Ha’u hanoin CEFTEC labele hanesan embriaun ona, maibé presiza evolui-an di’ak liután liuhosi fó formasaun ba joven sira ho kualidade tanba tempu agora presiza haree oinsá forma joven sira kualidade”, nia afirma.

Akara refere liután, Governu liuhosi Sekretaria Estadu Komunikasaun Sosiál (SEKOMS) kontinua apoiu nafatin atu CEFTEC bele dezenvolve di’ak liután, la’ós hanesan de’it embriaun.

Nune’e, bele fó formasaun ba joven sira ho kualidade tanba CEFTEC rasik hetan ona rekoñesimentu ba iha ninia kuríkulu rasik.

Parte seluk, Konselleru Konsellu Imprensa (KI), Hugo Fernandes, apresia servisu CEFTEC tanba bele fó formasaun ba joven sira iha área komunikasaun.

Nia kondsidera, inisiativa ne’e nu’udar pasu pozitivu tebes atu kapasita joven sira ho kualidade iha área formasaun komunikasaun sosiál nian.

“Ba oin se bele CEFTEC rasik labele sai ona hanesan embriaun maibé oinsá transforma-an ba institutu formasaun ida atu kapasita joven, nune’e sira bele aprofunda koñesimentu iha área komunikasaun di’ak liután”, nia subliña.

Nune’e mós,  Diretór CEFTEC, Luís Evaristo dos Santos Soares, hateten dadaun ne’e CEFTEC iha unidade kurikulár hamutuk 8, maibé tinan ne’e CEFTEC rasik prioritiza de’it ba matéria unidade balun.

“Tinan ne’e ami fó prioridade ba unidade-rua maka hanesan matéria unidade kuríkulu protokolu no multimedia rasik”, nia informa.

Nia dehan, ba tinan-ne’e estudante ka formadu sira ne’ebé maka tuir formasaun iha CEFTEC hamutuk na’in-74 no balun hili unidade protokolu no multimedia.

Formandu sira ne’e, mai husi institusaun Governu sira, inklui membru institusaun Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), nune’e mós joventude na’in-haat husi kada sentru informasaun ne’ebé SEKOMS hili ona atu jere Programa Naroman ba Suku.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here