Primeiru-Ministru, Taur Matan Ruak, prezide reuniaun Konsellu Ministru iha Palásiu Governu, kuarta (04/03). Imajen TATOLI/Egas Cristovão

DILI, 04 marsu 2020 (TATOLI) – Governu liuhosi reuniaun Konsellu Ministru (KM) aprova ona Dotasaun Orsamentu Temporária (DOT) ba fulan-marsu 2020 nian ho montante 116.449,057.

“Ohin Ministra Finansa ein ezersísiu, Sara Lobo Brites aprezenta projetu deliberasaun husi Governu, ne’ebé Konsellu Ministru aprova ona kona-ba tetu orsamentál ba fulan-marsu iha ámbitu rejime doudesimál ho valór totál $116.449,057”, informa Ministru Reforma Legiativa no Asuntu Parlamentar, Fidelis Manuel Leite Magalhães liuhosi konferénsia imprensa hafoin ramata reuniaun ordinária ezekutivu iha Palásiu Governu, kuarta ne’e.

Ministra Finansa ein funsaun, Sara Lobo Brites, konfirma katak DOT ba marsu ninia montante sei la dook husi janeiru no fevereiru.

“Atribuisaun DOT iha fulan-marsu loloos kedas montante ne’ebé atribui iha fulan-janeiru no fevereiru. iha marsu nian hamutuk $116.449.057, husi totál ne’e fahe ba kategoria saláriu no vensimentu hamutuk $17.852,076, kategoria bens no servisu $38.614,980, transfénsia públika $16.591,048 no kapitál dezenvolvimentu $33.390,953, esklui kapitál menór”, relata Ministra Sara Lobo.

Atuál Vise-Ministra ne’e dehan, orsida lorokraik Ministériu Finansa (MF) sei lansa ba sistema no aban ministériu sira bele hahú ezekuta.

Antes ne’e, Governu liuhosi reuniaun Konsellu Ministru aprova Dotasaun DOT ba fevereiru 2020 ho montante $116.449,057.

Montante totál despeza fahe ba kategoria haat hanesan saláriu no vensimentu $17.852,067, bens no serbisu $38.614,980, transferénsia públika $26.591,048, no kapitál dezenvolvimentu $33.390,953, nune’e ninian totál $116.449,057.

Utilizasaun rejime duodesimál sura hosi prosesu aprovasaun Proposta Lei Orsamentu Jerál Estadu (OJE) 2020, ne’ebé seidauk konklui no la tama vigór iha 1 janeiru 2020.

Nune’e, rejime ne’e sei ramata automatikamente bainhira orsamentu 2020 tama iha vigor.

DOT ba janeiru 2020 ho valór millaun $116, fahe ba kategoria saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6 no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here