Komandante Aquito. Imajen/Eugénio Pereira

DILI, 3 marsu 2020 (TATOLI)—Veteranu tinan 24 iha ai-laran, Lourenço José Cabral “Aquito” husu Governu kroa lei hodi asegura oan-ki’ak veteranu sira-nian tanba oras ne’e veteranu balun mate ona maibé faluk no oan kiak sira-nia kondisaun moris laduun di’ak.

“Lei laduun garante ba ami maibé loloos ne’e Maun Xanana, maun Matan Ruak, Maun Lere no Maun Lú Olo mak ko’alia netik buat sira-ne’e. Lei la fó fatin ba ami, ami bele ko’alia maibé ema barak la aseita no ema barak la konkorda para atu bele asegura ami-nia feen ho oan entaun ami labele halo buat ida,” Komandante “Aquito” informa ba Agência TATOLI hafoin partisipa loron nasionál veteran nian iha Sentru Konvensaun Dili (CCD-sigla portugés), tersa ne’e.

Nia afirma, veteranu hotu-hotu kumpri orden komandu luta nian entaun pasiénsia de’it hanesan ne’e hodi simu subsídiu ne’ebé Governu fó ona.

“Ita haree hanesan saudozu Samba 9 no komandante sira seluk nia família moris laduu di’ak tanba lei la asegura. Governu ko’alia de’it. Ami bele ko’alia barak ba Estadu maibé lei la fó dalan ba ami, ami labele halo buat ida,” nia dehan.

Veteranu tinan 24 ne’e afirma, bainhira lei ruma espesífika ba veteranu entaun bele asegura faluk no oan-kiak sira husi veteranu sira ne’ebé mate tiha ona ne’e.

Nia dehan, estadu rekoñese ona loron boot ba veteranu sira maibé presiza lei hodi bele sai hanesan baze legál ba futuru.

“Se laiha dekretu lei ruma, ami bele ko’alia mós ema sei la rona ami. Tanba ita hanoin ba pasadu saida mak terus, dalaruma ita tuur hodi hanoin no matan-been monu,” nia hateten.

Veteranu ne’e dehan, prinsípiu veteranu nian lakohi buat ida ezije maibé realidade ne’ebé akontese ba veteranu balun ne’ebé mate ona ninia oan susar tebes.

“Loloos ne’e, labele! Ami lakohi konta saida mak ami terus iha funu naruk ida ne’e maibé veteranu hanesan ai-riin ba estadu ida-ne’e,” nia haktuir.

Iha fatin hanesan Veteranu tinan 24 atuál membru Konsellu Kombatente Libertasaun Nasionál Munisípiu Lautem, Eurico Rosário dos Santos “Iku Junik”, reforsa solusaun ne’e atu asegura veteranu tenke dekreta lei hodi apoia veteranu sira.

“Agora ba-oin ne’e tenke halo lei ida kona-ba veteranu sira-nia situasaun,” nia dehan.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here