Veteranu Eurico Rosario.Imajen/Florencio Ximenes

DILI, 3 marsu 2020 (TATOLI)—Veteranu sira husu estadu tenke halo balansu entre pensaun veteranu no pensaun vitalísia tenke balansu tanba veteranu sira terus ba prosesu funu naruk ida-ne’e to’o tinan 24 nia laran.

Asistente Rejiaun Ponta Leste atuál membru Konsellu Kombante Libertasaun Nasionál Munisípiu Lautem (CCLN-sigla portugés), Eurico Rosário dos Santos “Iku Junik” hateten pensaun ba veteranu ne’e tenke balansu ho pensaun vitalísia ne’e tanba deputadu sira tuur iha Parlamentu Nasionál, sira luta de’it tinan lima  nia laran.

“Ita kompara deputadu sira tinan-lima de’it tuir partidu maibé ema ida halo funu to’o tinan 24 nia laran ne’e hetan de’it $230 ne’e mate nian no $260 ne’e moris nian. Ami husu pensaun veteranu no vensaun vitalísia ne’e tenke balansu tanba durante ne’e Governu halo diskriminasaun boot hasoru veteranu sira. Terus iha ai-laran durante tinan 24 nia laran ne’e, la fasil hanesan tuur tinan-lima iha parlamentu,” Veteranu Iku Junik informa ba Ajencia TATOLI, hafoin partisipa selebrasaun loron nasionál veteran iha Sentru Konvensaun Dili (CCD-sigla portugés).

Asistente Ponta-Leste iha tempu funu ne’e hateten, veteranu sira ne’ebé ho grau 15 a 19 simu de’it dolar $300 kada fulan.

Veteranu Eurico Rosario.Imajen/Florencio Ximenes

“Agora, ami 24 anos ne’e balun grau III simu $400-resin, grau II ba asisente sira simu $517. Depois Adjuntu sira simu $550. Katuas Lere Anan timur hetan no simu de’it $$700 kada fulan. Maibé, kompara ho deputadu sira manán liu. Deputadu sira tuir partidu, la’ós tuir sakrifísiu. Agora ita kompara sakrifísiu ho partidu ne’e, la hanesan. Sira ba tuur iha sofa leten depois hahan mós di’ak. Kuandu fila ba uma ho karreta luxu maibé veteranu sira laiha,” nia hateten.

Veteranu tinan 24 ne’e hateten, Governu tenke valoriza didi’ak kondisaun veteranu sira-nian tanba veteranu terus iha ai-laran to’o ohin loron ema hotu goza independénsia.

“Tuir ha’u-nia haree veteranu balun tuur parlamentu ne’e la’ós veteran. Sira-nia pesoa mak veteranu tanba autokrasia mak mosu iha parlamentu. Buat kiik ka boot ne’e, kona sira-nia interese nusá mak defende veteranu nia interese. Kuandu autokrasia mosu sai fali monokrasia. Sira-nia família iha kotuk mak kaer projetu. Veteranu sai vítima nafatin,” nia esplika.

Entretantu, Veteranu tinan 24 iha ai-laran, Lourenço José Cabral “Aquito” hateten, pensaun ne’ebé estadu fó ba veteranu sira ne’e la duun sufisiente.

“Ami sempre hatete hanesan ne’e, uluk haan de’it marotok sei moris, agora ita labele moris tanba saida? Maibé loloos estadu fó subsídiu ne’e ba veteranu la sufisiente. Hanoin fali pasadu, ami hatete hanesan ne’e laiha buat ida, pensaun ne’e bele ona sustenta ami,” Komandante Aquito hateten.

Nia esplika, subsídiu ne’ebé Governu oferese hodi selu oan sira ba eskola no ajuda ba organizasaun klandestina ne’ebé mak inan-aman sira sei moris maibé kbiit la to’o ajuda ba eskola.

“Osan ne’ebé ha’u hetan, ha’u sustenta ba ha’u-nia família no sorin ha’u ajuda família balun ne’ebé ha’u labele fó-sai naran,”  nia haktuir.

“Ami-nia hakarak ne’e pensaun ida ami-nian ho deputadu sira-nian ne’e tenke balansu maibé ida-ne’e ami la ezije.Pensaun vitalisia ho pensaun veteran ne’e tenke hanesan,” nia dehan.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here