iklan

NASIONÁL, EKONOMIA, HEADLINE

MOP Sei Avalia Relatóriu Estudu Viabilidade ba Projetu Dada Bee Husi Mota Railaco

MOP Sei Avalia Relatóriu Estudu Viabilidade ba Projetu Dada Bee Husi Mota Railaco

Diretór Nasionál Servisu Água no Saneamentu, Gustavo da Cruz. Imajen Tatoli/Hortêncio Sanches

DILI, 02  marsu 2020 (TATOLI)–Progresu estudu pré-viabilidade no viabilidade ba projetu dada bee husi mota Railaco no Gleno ne’ebé hala’o husi kompañia internasionál husi Tailándia no Koreia, daudaun ne’e finaliza no entrega ona ba Ministériu Obra Públika (MOP) liuhosi Diresaun Jerál Água no Saneamentu (DGAS-sigla portugés).

Diretór Jerál DGAS, Gustavo da Cruz, informa estudu ne’ebé finaliza ona sei avalia hafoin publika iha fulan marsu ne’e nia-laran.

“Prosesu estudu viabilidade ba projetu dada bee ka projetu barrajen iha mota Railaco no Gleno, empreza sira finaliza no entrega ona ninia relatóriu finál. Ami sei hadi’a  hafoin semana tolu ka fulan ne’e ami publika ona”, tenik Diretór Jerál ba Agência TATOLI iha Salaun Delta Nova, Comoro, segunda ne’e.

Notísia Relevante: Governu Planeia Taka Mota Railaco-Gleno Lori Bee Mai Dili

Direjente ne’e realsa, rezultadu husi estudu viabilidade ne’e hatudu viável atu halo barrajen ka bele dada bee husi mota rua ne’e hodi fornese ba abitante iha Kapitál Dili.

Nia adianta liután, haree ba kompañia rua ne’e ninia estudu, nia iha esperansa bele finaliza hodi hatama ezbosu ne’e atubele hahú loke ba dezeñu detalladu.

“Ita haree husi kuantidade bee iha mota Railaco no Gleno viável atu dada mai iha Dili, tanba ne’e ita haree fazeadamente tanba estudu viabilidade hotu ona. Ita sei loke tan halo dezeñu detalladu ba barrajen hafoin sei iha faze implementasaun ba konstrusaun barrajen”, nia akresenta.

Nia haklaken, razaun empreza rua ne’e halo estudu viabilidade atu haree no analiza ba estrutura rai, nune’e bele halo barrajen hodi prodús bee-moos atu fornese mai iha kapitál Dili.

Antes ne’e, Governu liuhosi Ministru Obra Públika, Salvador Eugénio Soares dos Reis Pires, asina ona kontratu ho kompañia internasionál husi Tailándia ho Koreia iha loron 22 agostu 2019 atu halo estudu pré-viabilidade no viabilidade ba projetu dada bee-moos husi mota Railaco no Gleno, Munisípiu Ermera mai Kapitál Dili.

Ministru Salvador esplika, planu integradu ba estudu ne’e foku liubá produsaun bee atu fornese bee ho kualidade no saudável ba komunidade sira iha Dili, tanba produsaun bee-moos iha Dili durante ne’e depende de’it ba perfurasaun ho estasaun 26 husi bee ne’ebé iha rai-okos, tanba ne’e la sufisiente.

“Ita hanoin estudu viabilidade maka fó rezultadu di’ak, ita bele avansa ba dezeñu enjeñaria detallada atu halo barrajen iha mota Railaco atu lori bee mai Dili”, nia akresenta.

Sistema produsaun bee iha Dili, kada loron kuaze prodús litru millaun 52, ne’ebé fornese ba populasaun tuir sensu 2015 hamutuk 267.000 no distribui bee ba uma-kain kada loron litru 500, tanba ne’e presiza aumenta produsaun bee kada loron litru millaun 40 atu fornese ba abitante sira iha Dili.

Kompañia ne’e maka Team Consulting Engineer and Management PCL, Thailandia in JV With ATT, Consultations Company Limited, Association With Thailand and in CQ2, Engineering Consultancy ne’ebé konsórsiu họ kompañia Diversu Unipessoal, Lda inklui Donsung Engineering Co. Ltd, Korea and in Association ne’ebé konsórsiu ho empreza Kai Watu Kmanek Consultant Unipessoal, Lda.

Kompañia internasionál rua ne’e, manán konkursu liuhosi prosesu Komisaun Nasionál Aprovizionamentu (CNA-sigla portugés) ho orsamentu millaun $1, ho durasaun estudu hahú hosi agostu 2019 to’o janeiru 2020 (durante fulan lima) ho distánsia hosi Ermera mai Dili kuaze kilómetru 30-resin.

Jornalista: Florencio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!