Xefe Estadu Maiór Jenerál F-FDTL, Majór Jenerál Lere Anan Timur Imajen/Eugénio Pereira

DILI, 2 marsu 2020 (TATOLI)—Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur hateten, nasaun ida istória laiha ne’e hanesan nasaun ne’e klamar laiha. Tanba ne’e, husu ba timoron ida-idak tenke relembra Timor-Leste nia istória pasada hodi refleta.

“Nasaun ida istória laiha ne’e hanesan nasaun ne’e klamar laiha. Tanba ne’e, ohin, iha loron nasionál veteranu ida ne’e, ita hotu-hotu halo reflesaun atu hanoin hikas ita-nia istória pasadu hahú husi 1974 to’o 1999,” dehan Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, iha ninia liafuan abertura ba semináriu ho topiku “Relembrar o Pasado Consolidar o Presente Projectar o Futuro, Memorias 1974-1999 Ba Jerasaun Ohin no Aban Bainrua” iha Sentru Konvensaun Dili (sigla portúges, CCD), Caicoli, Dili, ohin.

Nia haktuir, tuir istória pasada ne’ebé liu tiha ona hatudu katak aat ne’ebé funu-nain sira halo iha funu laran, selu ona ho funu-na’in no povu Timor-Leste nia susar durante tinan 24 nia laran.

Hahalok di’ak sira, nia hatutan, ne’ebé funu-na’in sira no Povu Timor-Leste halo iha iha tempu funu, lori ona Timor-Leste ba hadau ukun rasik-aan

“Aat ne’ebé ita halo selu ho ita-nia susar. Di’ak ne’ebé ita halo mak ukun rasik-aan ne’e. Iha 1999 ita hili opsaun rua. Hili ukun rasik-aan no autonomia. Maibé, agora sira ne’ebé uluk hili autonomia mak sama fali ita. Sira mak mak goza liu Timor-Leste nia ukun-aan ida ne’e,” Lere hateten.

Tanba ne’e, Lere husu ba ba veteranu sira atu matan moris no neon na’in hodi haree ba situasaun polítika atuál ne’ebé oras ne’e la’o daudaun.

Veteranu sira, nia dehan, tenke neon na’in hodi tulun lider sira atu fó solusaun ba ukun na’in sira atu bele solusiona impase polítika ne’e hodi hamatan ba povu Timor-Leste nia moris di’ak.

Jornalista : Osória Marques

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here