Veteranu Reis Kadalak ho raan iha oin. Imajen/foti hosi kronolojia Facebook Alex da Costa

DILI, 02 marsu 2020 (TATOLI)–Kazu agresaun fízika ne’ebé halo hosi suspeitu ho inisiál R hasoru veteranu Reis Kadalak, laiha relasaun ho veteranu, maibé iha indísiu problema privadu no família.

Kronolojia hosi kazu ne’e, ne’ebé iha hela investigasaun polísia nian katak kazu ne’e mosu tanba Reis Kadalak basa uluk vítima R (inan-feton ida) iha Bairru Pité, Dili, ohin dadeer, purvolta tuku 09:00 otl.

Komandante PNTL Munisípiu Dili, Superintandente Xefe Armando Monteiro. Imajen/TATOLI

Komandante Polísia Nasionál Timor-Leste (PNTL) Munisípiu Dili, Superintendente Xefe, Armando Monteiro,  informa, dadeer ne’ebá vítima R (inan-feto ida) atu sai hosi nia uma (inan-feto ne’e nia uma) liuhosi Reis Kadalak nia uma oin (viziñu).

Derepente de’it, Reis Kadalak ho vítima R ne’e ibun-ibun malu hodi halo Reis Kadalak la satisfeitu foti liman basa kedas vítima R. Nune’e,  vítima hola inisiativa ba halo keixa iha Postu Seguransa Unidade Polisia Espesiál (UEP), Bairru Pité.

Momentu ne’e kedas, tuir informasaun ne’ebé Armando Monteiro hatutan katak, vítima R mós fó hatene  nia-oan mane ho inisiál R mós ne’ebé nu’udar membru Polísia Nasionál Timor-Leste (PNTL) iha Eskuadra Polísia Dom Aleixo.

La hanoin barak no ho nervozu, suspeitu R nu’udar vítima R nia-oan mane ba kedas hasoru Reis Kadalak no halo agresaun fízika hasoru Reis Kadalak hodi rezulta Reis Kadalak nia reen-to’os kanek (raan sai barak) no ibun laran naklees to’o hakmumuk ran.

“Kazu ne’e daudaun iha hela prosesu investigasaun PNTL Eskuadra Dom Aleixo, Comoro, maibé parte rua lakohi halo prosesu bá-oin,” informa Armando Monteiro ba jornalista sira iha Komandu PNTL Munisípiu Dili.

Nia afirma, Komandu Polísia bolu ona suspeitu R ho vítima R nu’udár oan ho inan no parte sira, inklui Reis Kadalak iha relasaun família ne’ebé sira hakarak atu rezolve tuir família.

“Parte rua iha relasaun família ne’ebé sira hakarak atu rezolve tuir família. Maibé, bazeia ba lei, polísia kontinua prosesa nafatin,” hateten Armando Monteiro.

Jornalista : Nelson de Sousa

Editór       : Francisco Simões

 

PUBLISIDADE HUSI MTCIiklan

1 KOMENTÁRIU

HAKEREK NO HATÁN

Please enter your comment!
Please enter your name here