Espesialista husi USAID ko’alia iha workshop kona-ba Sistema Alfándega iha Timor-Leste, iha Edifísiu Akait, segunda (02/03). Imajen/Natalino Costa

DILI, 02 marsu 2020 (TATOLI) – Kámara Komérsiu no Industria Timor-Leste (CCI-TL,sigla portugés) hamutuk ho United States Agency for International Development (USAID), realiza workshop ida kona-ba “Difikuldade Importadór no Esportadór ho Sistema Alfándega iha Timor-Leste”, ne’ebé hanesan Projetu Reforma Aduaneira ba membru ne’ebé durante ne’e hala’o atividade importasaun no esportasaun liuhosi Sistema Alfándega.

Vise-Prezidente CCI-TL ne’ebé trata Asuntu Infraestrutura, João Fernandes Alves, konsidera Governu presiza halo reforma iha servisu Autoridade Aduaneira ka Alfándega tanba burokrasia ne’ebé maka regula difikulta emprezáriu sira hala’o atividade importasaun no esportasaun hodi kontribui ba ekonómia rai-laran.

“Dadaun ne’e, CCI-TL haree ba atividade iha Portu Dili dalaruma komplikadu tanba kuandu empreza sira atu hasai sira nian sasan, sempre kona demurrage (kustu adisionál). Ita bele hateten katak tenke halo reforma iha parte Alfándega”, dehan João Fernandes iha Akait, segunda ne’e.

Nia dehan, maski kona-ba kestaun ne’e parte CCI-TL durante tinan ida nia laran seidauk hasoru malu ho parte Alfándega, maibé presiza duni halo reforma tanba importante no kondíz ho situasaun agora.

Tuir nia, parte CCI-TL dadaun ne’e simu lamentasaun barak husi emprezáriu sira ne’ebé nu’udar importadór sasan.

“Ami simu lamentasaun husi emprezáriu sira, barak liu mai hato’o sira nian susar liuliu ba emprezáriu sira ne’ebé importa sasan mai katak bainhira sira hatama sasan no to’o iha Portu Dili, servisu Aduaneira nia burokrasia difikulta. Entaun barak mak kona demurrage”, nia informa.

João Fernandes akresenta, bainhira kona demurrage, sasan barak mak labele fa’an ona.

“Liuliu ai-fuan no buat seluk ne’ebé maka liu prazu ona. Tanba ne’e maka kauza sasan nia folin sa’e hanesan bee hemu tenke fa’an ho presu 0,25 sentavu, balun to’o 0,50 sentavu. Ita hanoin ne’e laiha lójika maibé tanba sasan sira ne’ebé empreza sira hatama mai iha portu liu semana to’o fulan maka folin tenke sa’e tanba kauza burokrasia ne’ebé iha servisu Alfandega nian”, nia realsa.

Tanba ne’e, CCI-TL liuhosi okasizaun worshop, konvida mós espesialista na’in-rua husi USAID maka Anthony Cambas no Geoffrey R. Thorne, atu aborada kestaun simplifika sistema servisu iha Autoridade Auduaneira nian, tanba haree ba ezijénsia husi empreza sira ne’ebé husu atu CCI-TL nu’udar mahon ba empreza Timor-Leste bele tulun sira ninia preokupasaun.

“Oinsá ba oin Governu halo reforma ida iha setór Alfándega, nune’e hafasil emprezáriu sira atu hala’o atividade importasaun no esportasaun. Liuliu oinsá CCI-TL hamutuk ho Governu atu haree halo mudansa iha regulamentu sira iha Alfándega nian hodi labele difikulta emprezáriu sira tuir kondisaun ne’ebé maka iha”, nia dehan tan.

“Ho situasaun ekonómiku ida hanesan ne’e, ami sente katak importadór sira ne’ebé maka hatama sasan hanesan pilár importante ida liuhosi sira ninia atividade atubele suporta ekonómia rai-laran”, nia argumenta.

Tanba ne’e liuhosi workshop, parte USAID konkorda hodi esplora liután kona-ba kestaun ne’e ho CCI-TL liuhosi espesialita sira ne’ebé halo aprezentasaun hodi ajuda ba kestaun importante no konsidera nesesáriu atu halo reforma iha servisu Alfándega nian, nune’e labele difikulta emprezáriu sira.

“Ami kleur ona servisu hamutuk ho USAID iha área aduneira nian, nune’e mós iha área turismu nian, ami nia parseria ho sira ne’e kleur ona. Tanba ne’e sira prontu atu ajuda hodi haree halo reforma iha servisu Alfándega nian, liuliu kona-ba lei no regulamentu sira ne’ebé iha atu labele difikulta servisu importadór nian”, nia adianta.

Iha fatin hanesan, Prezidente CCI Munisípiu Ermera, Luís Alves Tilman, apresia ho tema ne’ebé aborda iha workshop ne’e.

“Ha’u konkorada ita tenke kontinua ho worshop sira hanesan ne’e tanba kapas. Ita presiza halo reforma iha Autoridade Aduaneira nian, hanesan reforma lei sira atubele fasilita ita nian setór privadu sira. Setór privadu ho ajénsia sira bele ko’alia maibé desizaun ikus liu mak ita tenke koordena didi’ak ho Governu, tanba bainhira presenza Governu laiha, bele iha worshop maibé atividade la la’o”, nia dehan.

Tuir Luís, nu’udar emprezáriu nasionál, presiza duni halo reforma iha parte Alfándega atubele fasilita emprezáriu sira ne’e halo importasaun.

“Ohin ha’u dehan ita presiza reforma husi parte Alfándega ne’e klaru, maibé agora vontade Governu iha ka lae? Ida-ne’e maka problema”, nia akresenta.

Jornalista: Natalino Costa

Edirora: Julia Chatarina

HAKEREK NO HATÁN

Please enter your comment!
Please enter your name here